3 Pilar pa aumenta bo benta den 2015.

3 Pilar pa aumenta bo benta den 2015.

Scirbi pa Steve Francees

Nos Mercado ta hopi bon, tin hopi bon oportunidad den dje y sigur lo bira hopi mihor cu 2014, esaki mi a bisa un amigo y el a spanta, habri wowo asina grandi! E no por a kere cu lo tin cos bon den 2015!

Su problema ta cu, e ta tende di hendenan negativo y esaki a cuminsa domina su accionan y tambe a crea miedo den dje, un persona cu ajega di bende masha hopi cu awor ta mira futuro hopi skeptico.

E prome manera pa subi benta ta pa revisa bo amigonan di mas serca, nan ta negativo?, nan kier logra mas den bida? ta nan ta esunan cu ta hinca miedo den bo? Nan ta mira problema y sin mira oportunidad? Revisa ken ta rond di bo? Y saca afo ken ta esunan cu a strobabo!. Scohe amigonan nobo y sera amistad cu bendedornan cu ta bende hopi mas cu bo y sinja di nan!

E di dos ta cu bo mester traha un lista di tur loke bo a hasi den 2014, cuanto biaha bo a bishita un cliente, cuanto benta bo a hasi, cuanto cliente nobo bo a logra etc, y tras di tur loke cu bo a scirbi bo mester duplica esaki 2X !!!! Den serio, djis Duplica loke bo a hasi anja pasa!!! Busca tur maneara posibel pa duplica loke bo a hasi y esaki por wordo hasi si bo plania mas eficiente y traha mas duro pa logra nan. Bo por duplica loke bo a logra anja pasa, tin mas hende cu alogre dus abo tambe lo por sigur. No spanta pero traha duro pa logra duplica bo target.

E di tres ta e “mindset” cu bo mester adkeri pa logra duplica tur loke bo a hasi anja pasa, e mindset adecua ta principal den tur cos pa e anja aki. Esaki ta un decision personal cu lo bo mester hasi, ningun hende por tume pa bo, pero ta bo mes. Esaki lo drecha con bo ta usa bo tempo, con bo ta traha mas eficiente, con bo ta traha mas duro, con bo ta us abo tempo personal y cu bo famia. Con lo bo tuma rechaso den e mercado, con bo ta mira bo mes y bo autoestima. Un decision personal pa hasi loke sea pa logra e metanan pa 2015, y esaki ta sumamente importante den nos mercado actual. Solamente esunan cu e mindset adecua lo vence den nos Mercado local aki.

Cuminsa awe traha riba loke bo a hasi anja pasa y duplica esaki como meta pa 2015, bini cu strategianan nobo pa logra e metanan aki, kisas bo mester re-educa bo mes, busca judansa den un area cu bo ta swaak den dje, of asta paga otro pa hasi algo cu ta tuma bo mas tempo pa hasi. Stop di gasta tempo tras di tv y celular, menos facebook ora di trabou y mira djis loke ta necesario. Si mainta ta e mihor tempo pa produci, dus zorg cu e tempo aki ta pa prospecting y traha duro riba clientenan nobo y service clientenan existente. Laga cosnan menos importante pa despues y no bruha e tempo cu otro cosnan. Traha eficiente y cuida bo autoestima!!!, si bo hasi esakinan sigur lo bo logra bo metanan den 2015. Blessings Steve Francees, 

stevefrancees@hotmail.com www.stevefrancees.blogspot.com

E prome paso pa exito den 2015!

E prome paso pa exito den 2015!

Scirbi pa Steve

E prome paso den 2015 mester ta pa tuma bentaha! Pero lagami splica esey!

Ami ta core mountainbike y den competencia tin varios strategia cu bo mester usa pa asina por logra jega den e promenan y asta #1, y esey ta cu for di comienso bo mester tuma bentaha Si for di tempran bo cuminsa duro y bai dilanti, lo bo tin bentaha riba esunan cu no a sali dje rapido ey. Hopi ta pensa cu nan lo cuminsa trankilo y catch-up mas despues, pero esey no ta e caso, den tur careda tin berehanan/camindanan cu ta un so por pasa y ta den e momentonan ey ta cu lo bo keda #1 den bentaha door cu ta imposibel pa esun patras di bo por pasabo. Akinan bo por descansa un tiki pa despues  sigui tuma bentaha y sigui bai dilanti! 

Dus pa 2015, bo mester sali riba un speed, no por sinta papia, reuni, debate, riba hopi ideanan, no, esey lo no por, djis tuma sierto desicionan cu tin prioridad, splica e strategia y planan pa 2015 y move, tuma bentaha, lansa e servicio nobo, promociona mas e negoshi y su productonan. Asina bo ta tuma bentaha riba e competencia y sigur lo bo ta mas dilanti durante di e anja 2015!

Dus tuma bentaha for di e prome simanan di e anja y mantene bo posicion dilanti y sigur lo bo jega den e promenan y probablemente #1 tambe.

Blessings Steve

Mentalidad pa dobel e exposure di bo propaganda!

Mentalidad pa dobel e exposure di bo propaganda!

Scirbi pa Steve Francees

Un di e mihornan den lansamento y ta un bon propaganda ta ora nan ta bai bini cu un pelicula nobo y akinan por sinja masha hopi mes.

Hende ta gusta di ta parti di un grupo of un momento espesifico, unda nan emocionan ta wordo altera, sea ta pone nan den spanto of den tristesa, crea emocionan fuerte di rabia,despues na final ta bini cu un final felis y wordo motiva di nobo. 

Mi a jega di bai un workshop di conta storia y teatro, y tur e ingrediente ta hinca den e script, esun cu scirbi e script mester sa bon con ta hinke den otro pa asina por crea un mayor emocion durante di e obra. Tin un secuencia con pa scirbi un script y tambe den marketing esaki ta esencial pa asina bo por logra aumenta e exposure di bo propogada.

Ora un persona drenta pa mira un pelicula, esey ta parti di e producto, pero ya prome cu esey bo awordo bendi caba cu e idea di bai mira e pelicula.

E lansamento di e pelicula ta cuminsa  casi un anja prome cu e pelicula sali y progresivamente ta bai jega e climax cu tur hende kier bai mira e pelicula.

Kico asina bo por sinja di nan pa asina logra mas exposure pa bo producto: Nan ta usa actornan bon y cu ya tin hopi hende cu ta gustanan como actor. Un progaganda mester tin imagen cu e prospecto por relaciona cu ne y esakinan ta imagenan humano, usa hendenan cu ta trek atencion y akinan no ta cara bunita so ta conta, Shrek segun regla normal no ta conta di asina bunitesa pero alogra di alcansa curason di miyones di hende. Pero mester usa imagen, sea fuerte, no comun pa asina por trek atencion na bo producto y servicionan.

Bon design tambe ta un parti masha importante den un lansamento di un propaganda, no laga cuakier persona design bo propaganda, pasobra e no sa con ta hinca e aviso den otro cu ta trek atencion pa bo producto. Un design mester capta atencion di e publico cu abo kier gana nan atencion, kisas e aviso ta masha bunita y falta e ingrediente pa trek e prospecto pa tuma e decicion pa bin cumpra of bishita bo negoshi.

Traha un calendario, no lansa un campanja grandi den un temporada di boroto, asina lo bo perde exposure, sea hasi’e net prome cu e boroto general pa asina tin mayor atencion riba bo propaganda.

Inverti den publicidad cu ta klop cu bo producto, no kere tur cu bini bende bo propaganda, kisas e media ey ta bon pero no ta bo mercado cu bo kier nan como cliente. Sa ta ken ta bo target-segment(Mercado meta), y enfoca riba nan solamente, si e media ta barata no tume, pero si e ta caro pero ta jega direct riba e target-market, bai pe. Inverti den publicidad ta sumamente importante pa e exito di e compania. E problema actual di varios negoshi ta, cliente, nan no tin suficiente cliente y gran parti di esaki ta sinta door cu nan no ta inverti den publicidad, nan ta cumpra producto,drecha interior y cumpra propaganda robes y menos den crea demanda.

Traha trailers: Esaki ta peliculanan chikito cu ta duna un tiki di kico lo por spera, y akinan ta un strategia di mercadeo masha importante, duna “taste” di loke lo bini, si un campanja bon ta biniendo, cuminsa traha “trailers” chikito di loke ta biniendo y promociona esakinan. Si bo tin un bon producto ta biniendo, cuminsa bai den supermercado y hasi “Tasting” pa asina e prospectonan por cuminsa purba e producto. Esaki ta cuminsa habri caminda y progresivamente lo jega na un exito.

Lugar di lansamento: Esaki ta masha importante, nos tur ajega di mira un red-carpet y esaki ta un lugar ta masha special pa e personana special por jega y ta hopi exclusivo y prensa tambe lo tey, wel akinan ya e emocionan ta birando masha halto y e Mercado general lo ta intigra di bai mira e pelicula ora e sali e dia siguiente. Esaki ta e magno evento cu ta atrae mas atencion pa e pelicula y ta crea un enorme publicidad pa e pelicula por bende y gana placa. Tur esakinan ta pa crea mas atencion pa e pelicula.

Crea controversia: Esakinan ta trabounan di e criticonan di pelicula y esakinan ta crea controversia, un ta papia malo, e otro ta papia bon, un awordo ofendi di loke e otro a bisa, pero tur esakinan ta crea mas atencion pa e pelicula y  tambe ta hisa masha tanto e demanda pa e pelicula y peliculanan ta gana tur e placa den nan prome weekend ora e pelicula sali, door di tanto “fanfara” den publicidad. Den menos cu 3 dia ya nan bentanan ta cla y a surpasa sales-target y nan ta gana hopi placa, loke bini despues ta mas placa pa nan ainda.

Marketing ta un mindset, risico y inovacion, y mester tin e e puntonan aki pa asina por aumenta demanda pa loke bo ta ofrece. Blessings Steve

(297) 7380777 stevefrancees@hotmail.com

Creatividad lo subi benta pa fin di anja!

Creatividad lo subi benta pa fin di anja!

Scirbi pa Steve Francees

E Mercado actual ta exigi “cosnan” nobo, nan no ta wordo atrae mas pa cosnan bieu di 2 anja pasa, pero kier algo nobo y esaki mester wordo mira den tur loke bo hasi den marketing pa atrae atencion di e prospectonan. Fin di e anja aki lo bira un temporada masha importante pa benta pa asina nivela bek e anja cu pa hopi tabata bastante stressed-out! Creatividad lo genera mas entrada e fin di e anja aki, bin cu ideanan nobo, no tin miedo pa hasi “cosnan “ nobo y bini cu ideanan inovador pa atrae mas clientenan.

Creatividad tambe den bo negoshi mes, sea ta retail, usa creatividad pa laga e interior mustra diferente y acohedor!. Creatividad tambe den benta, educa e bendedornan pa asina test ideanan nobo, cambia nan strategia di benta y test strategianan nobo y asta nan manera di bisti y bisti mas trendy pa asina e cliente mira cu tin inovaccion den e empresa! Blessings Steve (297)7380777 stevefrancees@hotmail.com

4 efecto cu sigur lo afecta e mercado pa 2015

4 efecto cu sigur lo afecta e mercado pa 2015

Scirbi pa Steve Francees

Kico lo pasa den 2015? Esaki ta un pregunta cu awe lo mi kier contesta, mi no ta pretende di ta profeta pero segun cu mi ta analisa e Mercado y hasi pronosticonan di e impacta commercial lo a bini cu e siguiente prediccionan pa 2015 den loke ta trata nos Mercado local aki na Aruba.

E prome efecto lo ta cu Realestate, dus benta di casnan lo conoce un bahada den prijs. Casnan cu lo ta na benta lo baha di prijs pa asina por bende, por ehempel, si un cas ta costa 325.000, esaki lo por bende menos cu 300.000 dus rond 280.000. Awor dicon? Ami personalmente ta di opinion cu Aruba su mercado den Realestate ta “Overpriced”. Taxatie rapport ta wordo traha na beneficio di e donjo di cas pero segun ami ta net riba e realidad den e mercado actual. E balor ta wordo basa riba e echo cu Aruba ta un isla turistico y tambe tin potencial grandi den turismo y e “semper” ta den demanda. Pero esaki ta “intangibel” y ta un atmosfera cu no ta un base real. Asta e cumpradornan di casnan caro cu mayoria ta stranhero, cu hopi ta Mericanonan, nan ta mas conciente di prijsnan , door cu locual a pasa na Merca despues di 2007 unda prijsnan di casnan a baha drasticamente y manda hopi empresanan di realestate abou. Mi ruman muher a perde 100 mil dollar den un luna cu e bahada aki cu un cas na Florida, dus pa 2015, prijsnan di casnan lo mester baha, pa asina por bende e casnan riba listings. E donjo di cas lo haya menos pa su cas pero lo no tin otro opcion.

Di dos efecto pa 2015 ta cu autonan nobo lo experimenta un bahada, benta di auto nobo lo baha vooral den e prome 6 lunanan y lo pickup despues di juni 2015 y lo subi bek te mas den fin di 2015. Auto nobo tur dia ta birando un luho y esaki ta un echo cu mester biba cu ne! Auto nobo ta fit den un economia cu ta creciendo y 2015 ta un anja cu no lo mira masha crecimiento, mas bien ta un anja plateau, dus plataforma pa loke lo sigui pa 2016 pa ariba.  Empresanan di auto nobo mester focus mas riba negoshinan cu por cumpra auto nobo  pa asina jena e buraco cu lo presenta den e Mercado 2015. Pero engeneral, e potencial pa auto nobo lo baha pa 2015.

Di tres efecto pa 2015 ta cu productonan di marca, “branded product” lo conoce un bahada. Esaki ta e efecto door cu e anja 2015 lo ta anja plateau y lo no tin aumento grandi den economia y prijsnan di hopi producto y servicionan lo subi, y esaki lo tin un consequencia den e buying power di nos isla, cu na final lo remplasa “Branded Products” pa e productonan generico, dus productonan igual of di menos calidad cu por tin mesun “resultado”. Esaki lo ta fuerte den productonan di consumo, cu ama di cas lo cambia di marca pa un mas economico pa asina e placa por jega pa cumpra tur loke tin mester na cas. E efecto aki lo wordo mas sinti den lunanan di Januari pa juni 2015 y di September pa november 2015.

Di cuater efecto pa 2015 ta directamente pa e restaurantnan, mercado lo conoce un gama di cumindanan mas chikito y di menos cantidad y menos prijs. Restaurantnan lo mester implementa cumindanan chikito, bou di 10 florin, dus prijsnan entre 8 pa 10 florin pa asina por sigui bende. Esaki lo bira mas fuerte den “lunch” dus entre 11am pa 3pm. Mester hasi esaki pa mantene e clientele,dicon e cambio aki?, wel e buying power lo no crece hopi, dus prijsnan general a subi, dus e prjs pa come vooral merdia lo baha den poder, dus e solucion aki ta sumamente importante pa e restaurantnan por sigui bende. E restaurant lo no gosa di hopi ganashi, pero lo no tin otro option, pero mester bai den cumindanan mas chikito pa asina por keda na bida durante di 2015 y no perde cliente.

Pa tur problema tin solucion, y comercio mester pone mas enfasis den hasi cambionan mas rapido y test ideanan nobo. Crea un cultura di adaptacion, si algo no ta funcionando, y ta pasando e tempo cu ya e mester a duna su resultado, wel, djis cambi’e pa algo otro. Empleadonan mester tin mas “input: den decision di e compania pa asina hasi e problema aki algo di henter e empresa y sigur nan lo compronde ora tuma sierto desicionan, pero mester bini hunto pa tuma desicionan hunto. 2015 lo ta un anja cu no hopi crecemento door cu ta un anja Plateau, dus un anja cu lo ta plataforma, un  anja pa inverti den cambio y test idea,producto y servicionan nobo. Blessings Steve Francees

 stevefrancees@hotmail.com  www.stevefrancees.blogspot.com (297) 7390777