Diversifica den bo Marketing, Part 1

Diversifica den bo Marketing, Part 1

Scirbi pa Steve Francees www.stevefrancees.blogspot.com

Cada bes mi ta mira e fout cu empresanan ta hasi door di kere djis den un fuente pa haya clientenan nobo. Awor cu Facebook ta bastante hot, nan ta inverti den Facebook y lubida pa sigui desaroya den otro recursonan pa sigui haya mas cliente. Tin bastante media, manera Radio, TV,Corant,Internet,website y tambe tin direct media manera flyer, manda catalog na cas y aviso den revistanan. Tin billboards cu bo por huur na sitionan hopi transita y tambe na supermercado bo por pone aviso riba e borchi di anuncio. Tambe por bai den PR, hasi entrevistanan na e medianan y propaganda loke bo ta bendiendo. Bo por bai expo y expone loke bo ta ofrece,sponsor team di voetbal,tennis, baseball etc,  dus tin hopi maneranan pa haya clientenan nobo. Loke ta pasa ta cu ora un persona tin hopi stress, su creatividad ta bai atras y ta lubida cu tin mas medianan cu tambe e mester explora. No hinca tur bo marketing budget den un solo media, pero diversifica, pasobra cada media tambe tin su peak, dus kisas awe e radio aki ta hot pero mayan un actividad den bario ta bira asina grandi cu ta mihor bo pone un banner y sponsor e actividad aki y haya relacion direct cu e prospectonan.  Dus bo mester diversifica den bo marketing y sigui test y explora medianan nobo cu lo funciona pa bo negoshi. No keda pega anja den y anja afo cu e mesun, pero hasi cambionan y sigui diversifica. Cada media lo EXIGI un otro script (*esaki ta e text strategicamente scirbi pa logra comunica e idea y logra haya atencion di e target cu bo kier alcansa). Hopi, pero hopi placa di marketing ta bai benta afo door di un mal script, kisas tremendo media, bon momento, pero un script masha kens mes, kisas scirbi style di antes cu ya ta outdated, of usando e imagen cu no ta klop pa e propaganda ey. Propaganda cu ta bisa "nos ta #1" , "Nos tin calidad di servicio", y tur e script-nan ey cu ta djis halsa e ego di e compania, esey no ta funciona mas amigo. Tempo cu mi a studia marketing, nos tabata pasa oranan largo riba un script, hasi research over di cual ta e obhetivo cu mester logra cu e script ey y na ken of e target-market nos ta enfocando riba dje. Kico e mercado mester tende y lesa pa asina e por reacciona riba loke bo ta propagandando. Copy-writing ta un estudio riba su mes cu ta dura bastante largo, djis pa bo pone 20 palabra den otro. Dus ora bo diversifica den mas media, bo script mester cambia. 

 Un otro strategia ta asina: Corda cu bo target-market tambe ta lesa,mira y scucha diferente media, dus bo por usa varios script cu varios punto di bista pero riba mesun objetivo, por usa varios bosnan, diferente potret etc pero enfocando riba mesun meta cu bo kier pa e target-market reacciona riba dje. Un ehempel, si bo graba un spot usando un bos di hende muher, mas hende muher lo ta inclina na scucha e spot ey, si bo usa un mucha di 6 anja pa graba bo spot, direct muchanan lo sincronisa cu bo spot y producto. Diversifica tur loke bo ta hasi den marketing, vooral den nos mercado actual cu ta multi-cultural.

Blessings Steve

(297) 7380777 www.stevefrancees.blogspot.com     stevefrancees@hotmail.com