Cambionan empresarial pa 2013

(parti 1)

Scirbi pa Steve Francees,

Un anja cu hopi bon oportunidadnan pa esunan cu tin nan wowo habri y ta dispuesto pa inverti den nan empresa pa asina por logra lo mas cashflow posibel. Relacion cu cliente lo bira un “must” den tur sentido, si bo no inverti den relacion cu e cliente, bo benta lo baha sigur y sufri e consequencia. Dicon?, wel, door cu e buyingpower ya pa 5 anja caba awordo sinti, e clientenan ta mas sensibel con nan ta saca nan placa y bo mester tin balornan adicional pa asina tog logra pa e clientenan sigui cumpra bo producto of servicio. Esaki lo rekeri cu abo como empresa of bendedor individual mester tuma mas tempo pa desaroya relacionan objetivo cu e clientenan, corda den cada negosacion tin e relacion personal cu ta mas poderoso cu asta e prijs di loke bo ta bendiendo.

Si analisa rapidamente e Mercado actual (Aruba) por mira cu desde 15 di November, Valero a manda 450 trahador cas cu ta nifica cu 450 famia lo no tin entreda. Valero a paga algun mil na e trahadornan, pero esaki lo caba den e temporadanan di fiesta cu tabata Pasco/anja nobo y awor carnaval. Despues di carnaval lo sinti y peso financiero cu lo preciona atrobe e buyingpower di e Mercado actual. Tur persona cu risibi un cantidad di placa cu normal nan no a logra nunca di tin den nan poder, ta crea un actitud di ta poderoso y kier cumpra loke “nunca” nan por a cumpra, y esaki a sosode den temporada di Pasco/anja nobo. E problema lo bini ora e placa cuminsa caba den luna di maart-april y no tin entrada pa jena e saco bek, akinan e benta general lo sufri nan prome caida, door cu e Mercado lo mester paga nan gastonan cu menos placa, negoshinan cu no tin e cliente como algo importante, ta e promenan cu lo sufri den e Mercado cu lo bini.

Pero no spanta, ainda tin tempo pa re-evalua bo posicion y tuma pasonan. E problema ta cu mayoria hende ora bo bisanan cu cos lo cambia no pa bon, prome cos cu nan ta hasi ta cuminsa corta y baha gasto y ta net esaki lo costa cu lo bo sufri mas e caida den bo benta. Si bo no expone bo mes bon, y mantene bo producto/servicio den mente di e clientenan, lo bo sufri mas!. Hopi cuidou cu corta den loke bo no mester corta, dus enbes di corta vet, bo ta corta un ader importante, akinan bo mester laga bo instinto como comerciante funciona y no esun di un manager/accountant (kier controla tur cos). Bo mester inverti awor pa bo por pasa temponan difisil y mira tog benta subi, si bo corta den beneficio di trahador, lo bo mira bo benta baha, si bo inverti den empleadonan y laganan sinti cu abo tey pa nan den e tempo aki y ta willing pa incentivanan un tiki extra, y bo mester hasinan parti di e solucion, laganan sinti cu nan tambe ta den mesun boto y cu hunto por sali padilanti.

E capital humano lo bira algo masha importante den 2013, sin nan, benta lo no subi, nan mester ta willing pa duna e extra cu bo mester pa asina por “boost” e compania den 2013. Empleadonan mester wordo motiva den e structura di jega na e meta pa mantene y suprasa benta di 2012. Empleadonan mester wordo motiva pa ta mas creativo, bin cu ideanan nobo, ta dispuesto pa cambia nan manera di traha y ta mas agresivo, conciente cu nan tambe ta parti di e solucion.

Tur empleado ta wordo motiva na maneranan diferente y akinan e reto ta bira mas difisil pero mester saca afor ta kico ta motiva e empleado ey pa funciona mihor! Middle management mester tin mihor bista riba e Mercado, cambionan den e manera con e cliente ta cumpra nan producto/servicio, y e unico manera ta pa sali riba caya pa saca afor exactamente kico ta pasando y bini cu ideanan inovativo pa pusha e compania di nobo.

Directornan no por keda sinta tras di lesenaar mas, mester intercambia ideanan inovativo cu empleadonan, 71% di entrada ta bini di turismo (Aruba) y esaki ta efecta henter e Mercado directamente, menos tips, menos placa na cas y tips-nan ta bahando ya pa 3 anja caba (pa empleadonan cu no kier cambia nan manera di pensa/cultura).

Hopi hotel, a pasa y ta pasando door di renovacion, hopi empleado ta keha, pero esaki ta bon, pa bo keda “fit” den 2013 bo mester inova den imagen,structura, servicio y benta. Empresanan sabi, ta inverti grandemente den nan empresa y esunan bobo ta mara faha y corta bai gol

Pa benta subi ta imposibel hasi’e, si bo corta den bo compania, ta ilogico cu bo mester corta den bo productividad y na mes momento kier pa benta subi, esaki no ta asina. Un comerciante sa ki ora e tin cu inverti, aunke accountant bise algo diferente. E abilidad di comerciante bo no ta sinje na scol pero ta hanje ora bo tuma sierto risiconan empresarial y usa bo instinto cu ta bisabo cu esey ta posibel, literalmente cana riba awa! E “mindset” aki lo mester pa 2013, tuma risiconan y inverti den loke lo crea entrada extra pa e empresa, promociona inteligentemente y constante, hasi cambionan y monitor direct loke cu ta duna resultado.