Si bo meta
ta pa sera mas benta y logra convence e prospecto mas rapido, aki lo mi dunabo
e 5 puntonan cu por judabo “close” e benta mas rapido.
1.
No tin
necesidad di e producto: Manera bo presenta bo producto, direct den e mente
di e cliente ta cuminsa un guera di necesidad di tin e producto, su mente ta
hasiendo un scanning den pro y contra di e producto y tambe ta pone riba un
lista di prioridad y na final e logica di dje ta e decision final cu ta bisa cu
si e tin necesidad di dje so of no. Tur esaki ta pasa for di comienso ora e
persona aki jega e fase di hanja informacion te pa tuma un decision. Si bo
no crea necesidad pa bo producto den
mente di e prospecto, e lo no cumpra. Un manera pa cuminsa neutralisa su mente
ta pa duna beneficio cu e producto tin y pone hopi enfasis riba e Resultado cu
e prospecto lo hanja door di cumpra e producto. Hende ta cumpra resultado di e
producto y no e producto riba su mes! Pa crea tambe necesidad, bo mester crea
un relacion di e producto cu e emocion di e prospecto, con lo e bai sinti ora e
usa e producto, con usando e producto lo subi su autoestima y con otronan lo
mire, hende ta tuma mas decision riba emocion cu realidad/racional, nan ta
gusta sinti nan mes bon, vooral hende muher, nan ta relaciona tur cos cu
emocion y sintimento!homber ta mira mas e parti practico y style di e producto.
Dus si no tin necesidad, abo mester crea esaki durante di e proceso di benta.
2.
No tin
placa: Esaki ta parse e obstaculo di mas fuerte, pero na final por bira
esun di mas fasil, dicon?, si un persona kier algo, cu ta mas cara cu un otro
producto similar, si echt e kier e!, lo e hasi loke sea pa hanje, lo e bai y
bende otro cos pa asina e por cumpre!Otro cos!! No semper baha prijs ta bende
mas!!, hopi bendedor ta pensa cu baha prijs ta pusha e producto pa bende mas, e
problema ta cu baha prijs tambe ta baha balor di bo producto, dus e mentalidad
di baha prijs no semper ta funciona, loke Si, por hasi ta mihor prijs riba
sierto volume, dus usa mihor prijs ora jega sierto volume den benta, esaki ta
pusha e cliente pa cumpra mas serca bo y ta mantene e balor di e producto (den
mente di e propsecto) halto!. Tambe bo mester tin un plan di pago pa asina e
prospecto tog por cumpra e producto, firma un contract, paga parti di e suma pa
mantene e cliente pa despues e por paga e diferencia. Como bendedor bo mester
crea balor pa bo producto cu lo surpasa e prijs di e producto, pa asina e
prospecto pone bo producto riba e lista di prioridad den su mente y disidi di
cumpra bo producto y laga tur otro cu ta mas economico cay. E prospecto mester
sinti cu bo producto tin prioridad den su bida na e momento ey y sigur e lo
saca placa pa cumpre.
3.
No tin
pura: Urgencia ta e palabra clave den mente di un prospecto, mientrastanto
cu bo ta splicando beneficionan di bo producto, e prospecto ta bezig ta
poniendo su lista di urgencia den su mente y si bo no logra crea urgencia pa bo
producto, lo bo keda den e parti abou den su lista. E prospecto mester sinti cu
e “mester” di e producto ey y abo mester enfatisa cu ta sumamente importante cu
e mester tin e producto ey y como bendedor sigui crea urgencia pa bo producto,
si abo no hasi’e, bo competencia si lo hasi’e, y abo mester crea asina tanto
urgencia cu e prospecto disidi di cumpra direct. Pero crea urgencia den un
manera cu hopi respet, laga e prospecto sinti cu bo producto sigur lo aumenta
su calidad di bida den e areanan cu e tin necesidad di dje, awe ta e dia pa
tuma un decision y e urgencia lo aumenta e proceso pa jega na closing.
4.
No tin
deseo: Corda cu mas decision ta wordo tuma riba e base emocional cu e base
racional. Tur persona ta diferente y ta cumpra tambe diferente segun nan
personalidad, un persona cu ta cay den e seccion di analitico no ta cumpra basa
riba emocion pero mas bien racional, e ta analisa tur cos cu cabes friew pa
despues e tuma un decision,pero tambe e persona aki gusta cumpra “cosnan” bon
cu ta duradero cu lo hisa su calidad di bida y duna resultado pe. Un persona
Analitico kier detayes, y eynan e bendedor mester ta super bon den informacion
relevante di e producto y informacion cu ta duna resultadonan positivo di e
producto. E bendedor mester switch over na detayes pa asina crea un “deseo
practico” den mente di e prospecto pa asina e prospecto disidi di cumpra. Corda
cu e prospecto mas complica, hopi biaha lo bira e clientenan mihor y cu lo dura
mas cu bo. Usa imagen, nomber di hende cu e conoce cu tambe ta usa e producto,
mustra cartanan di recomendacion cu bo a hanja di clientenan contento y sigui
crea e deseo pa bo producto.
5.
No tin confiansa:
Wel, esaki ta super importante den e Mercado cu nos ta bibando, vooral aki na Aruba,
si mi no conose bo, mi no sa ken bo ta, cu otro palabra, mi no tin confiansa,
lo mi no cumpra. Confiansa ta algo cu hopi bendedor ta faya den dje, nan no ta
profundisa cu e prospecto suficiente pa asina crea confiansa cu e prospecto,
nan ta “net no” jega na e nivel di confiansa aki y esaki ta crea un obstaculo
pa sera e benta. Confiansa ta mas importante cu closing, pone atencion riba confiansa,
crea confiansa, hasi tur loke mester pa crea confiansa y profundisa lo mas
posibel. Un tips pa crea confiansa ta, busca cosnan cu abo y e prospecto ta di
acuerdo cu ne, ehempel “waw, sra tin un bunita oloshi, of e yu ta parse un
baby-Gerber, bunita cartera, si ta homber y tin un camisa di Yankees, por bisa,
ami tambe ta fanatico di Yankees, wel bo mester ta creativo y corda cu ta abo
mester busca e prospecto su confiansa y pone tur atencion riba e prospecto, abo
ni bo producto no ta importante, pero e prospecto como persona ta importante.
Confiansa ta e base di tur benta, dus pone pa crea confiansa come bo meta y
sigur lo bo jega na closing sigur! Duna confiansa y lo bo hanja confiansa y
sigur lo bo jega na closing.
