Kico e prospectonan No kier tende di bo producto!!!

Scirbi pa Steve Francees

Mercado no kier mas informacion pero solucion!

Asina mes! Mercado no mester di informacion di loke bo ta bendiendo, nan kier tende e solucion cu bo producto/servicio lo crea pa nan problema, ta na e parti aki e prospecto ta tuma e decision di cumpra bo producto. Tur persona cu buscando solucion!, pakico un mayor ta paga bijles pa su yu? No ta djis pa laga e yu bai pasa un rato felis cu e jufrouw! Of cu mayornan ta gusta hiba nan yu bijles?!, NO, nan kier pa nan yu subi su puntonan na scol, si e mucha ta para na un 5 pa wiskunde, mayornan kier mira e mucha jega un 7 porlomenos. Dus nos Mercado di awe kier solucion y esaki tin masha hopi di haber cu e calidad di servicio cu ta compaña e solucion. Dus ora ta pensa pa mercadea un producto mester saca afor cual ta e problemanan cu e prospectonan por tin y lista tur e solucionan cu e producto/servicio por logra pa soluciona e problemanan aki. Mester neutralisa e problemanan cu e solucionan cu e producto tin y busca solucionan extra cu ta subi e balor di e producto y esaki por ta hopi cos. Free delivery, habri mas laat, jama via telefoon prome cu bini, cumpra 10 haña 2 free, garantia di 6 luna etc, tur esakinan ta logra subi e balor cu sigur lo laga e prospecto tuma un decision pa cumpra mas lihe. Hende kier solucion, cura ta yen di yerbe?, mester di un persona cu ta cortanan vap-vap, tuberia ta kibra?mester di solucion y “awo”, esun cu tin e servicio ey ta haña e placa di e cliente!antes mester a warda basta pa chika-pos jega, awor bo ta caba di papia, ya nan ta pita pafor di cas!. Prospectonan kier solucion y esey bo mester mercadea. Blessings Steve

(297)7380777 stevefrancees@hotmail.com  www.stevefrancees.blogspot.com

Secreto EMPRESARIAL dicon Facebook a cumpra Whatsapp!

Secreto EMPRESARIAL dicon Facebook  a cumpra Whatsapp!

Nos tur a keda boca habri siman pasa ora e hoben lider di social-media, Mark Zuckerberg di Facebook a anuncia cu Facebook a cumpra Whatsapp pa 19 Biyon  y den e weekend cu a pasa, usuarionan di Whatsapp a experencia problema cu nan whatsapp. Wel nan tabata den e cambio di un empresa pa otro y e persona cu a inventa Whatsapp cu ta Jan Koum alogra un di su bentanan mihor di su bida. Un hoben cu a lanta den pobresa na Ukrania y a logra jega Merca, unda e mester a mop supermercadonan pa asina por sobrebibi y no por a termina su estudio y na final mester a bai traha. Jan mes a educa su mes den sistema di computer y a haña un oportunidad pa traha na Yahoo. 5 aña pasa a lansa su APP cu ta Whatsapp y awor Jan ta un biyonario, logrando di bende su APP cu facebook. Aki nos por mira dos hoben (Mark y Jan), tur dos a logra comercialisa nan ideanan den un tempo hopi record. Tur dos producto ta red-social y comunicacion, dus si pensa un rato bon, red di comunicacion tin hopi poder y esey Facebook kier y Mark sa e balor di tin comunicacion-masal den su man. E secreto commercial di Facebook ta “Tin e Red mas grandi di comunicacion na mundo”, door cu unabes e tin esaki, e por bende cualkier producto usando e plataforma di red cu e ta doño di dje. Na otro banda Jan tambe ta sabi, y door cu e tabata traha na Yahoo, a mira e importancia den comunicacion, tapesei el a traha Whatsapp. Kico empresanan aki na Aruba por siña di e dos hobenan biyonario aki?. Empresanan mester inverti den un red eficas di comunicacion pa jega serca prospectonan y un red eficas pa mantene comunicacion cu nan clientenan existente. No por hasi negoshi sin balora e red di comunicacion entre e prospecto cu e empresa, empresa cu faya den comunica efectivamente cu e prospectonan lo sufri door cu nan benta lo no subi y na mesun manera, si empresa faya di comunica efectivamente cu nan clientenan, lo tin chance pa perde e clientenan, si un otro empresanan cu ta bendiendo mesun tipo di producto, cu Si ta comunica efectivo cu nan. E plataforma di comunicacion den e structura(Marketing) di empresa ta Sumamente importante y esaki nos por a mira den e compra di Whatsapp.  Presencia online, social media, texting cu potret ta parti integral di Neo-Marketing y empresanan mester cambia nan strategia pa sobrebibi den e futuro sercano, medianan tradicion no tin e poder mas manera antes y e strategia di comunicacion a cambia y empresanan mester adapta rapidamente cu e desaroyo cu ta bayendo cu un speed hopi halto. Mester inverti den comunicacion, strategianan nobo con mercadea e producto y servicionan, esaki ta e sanger cu lo mantene e empresa riba nivel, inverti den strategianan nobo y comunicacion mester ta e plataforma. Loke awordo hasi 5 aña pasa ya no ta dunando su resultado mas y empresanan mester ta mas adelanta du e desaroyo di e Mercado pa asina tin e plataforma di marketing corecto, prome cu e Mercado jega eynan, ta miho lansa algo prome cu tempo cu despues di tempo(btw,  lansa algo na e momento apropia semper ta miho) . Blessings Steve

stevefrancees@hotmail.com   www.stevefrancees.blogspot.com (297) 7380777

5 cos cu Empresanan por siña di Leopoldo Lopez!

5 cos cu Empresanan por siña di Leopoldo Lopez!.

Scirbi pa Steve Francees, Consultant

Nos tur sa kico ta pasando na Venezuela y sa tambe di e ultimo actividadnan cu awordo hasi y cu e lider cu a lanta masha fuerte ta Leopoldo Lopez,  cu pa awe (20 di Feb) ta sera den prison riba ordo di gobierno Venezolano.  Un lider cu ta creciendo masha rapido y esaki ta e efecto di loke el a hasi cu sigur lo sigui hasi, pero kico empresanan por siña di e lider aki.

Logra gara atencion di e hobenan: E marcha cu te cu awor a duna mas resultado ta e marcha di dia 12 di Feb cu e studiantenan a subi caya y esaki a gara atencion di mundo henter. Leopoldo alogra aglomera hobenan, cu normalmente hobenan no tin miedo di tuma riesgo, nan ta bai all the way pa sigui un idea cu nan ta kere den dje. E forsa principal pa tur empresa ta sinta den e Mercado hubenil, nan por lanta of baha benta di un tremendo producto of servicio . Hobenan ta contagia otro y un ta pusha e otro pa tambe tuma risico y drenta den algo. Hobenan tin e poder di compra den nan man, nan ta disidi e tipo di auto cu nan mayornan lo cumpra, unda ta bai cu vakantie, con nan kier decora nan camber, unda nan kier cumpra paña, na cual restaurant e famia lo bai come, dus si pensa bon, ta nan ta tuma practicamente tur decision, dus  empresa mester target riba e hobenan tambe y esaki mester wordo hasi paralelo cu e adultonan pa asina e hobenan stimula e adulto(mayornan) pa cumpra sierto producto/servicio.

Para pa e berdad y sufri consequencia: Hopi biaha ora “cosnan” bira frega, of benta no a bai dje bon ey, of mester duna e cliente rason door di un fayo di un trahador, ta purba troce e berdad, pero esaki ta un principio cu mester para pa e berdad y si mester hasi algo extra cu asta lo crea perdida pa e empresa, mester hasi’e. Leopoldo a bai sera y a entrega su mes, door cu segun e, e sa cu e no a hasi nada contra ley, dus awor ta sufriendo e consequencianan di para pa berdad. Human Rights Watch tambe a Sali na su defens.

Haña admiracion di su pueblo y internacional: Awor Leopoldo ta hayando tur mas dia mas admiracion internacional, door di para pa e berdad y willing pa sufri e consequencia. Tur loke un empresa hasi cu ta genuine pa su clientenan y comunidad lo haña admiracion di e Mercado.  Trahando den marketing pa varios añanan caba mi ta mas convenci cu nunca cu, trabounan social den e comunidad di parti di e empresa ta mas efectivo cu cualkier propaganda, pasobra hasiendo un trabou den comunidad, judando comunidad, e empresa cu su prodcuto/servicionan ta bira aliado hunto cu e comunidad y e futuro clientenan ta sinti cu berdad e empresa aki ta sinti pa nan. Hende ta cumpra unda e ta sinti bon, asta Supermercadonan chines a cuminsa cuminda cliente y hari cu cliente den e ultimo temponan pasobra nan a cuminsa realisa cu contacto humano ta importante pa haña y retene cliente. Dus empresa mester tin admiracion di e comunidad/Mercado.

Crea emocion rond di loke bo ta hasiendo: Hende ta un ser hopi emocional, tur loke nan kier ta sinti bon y emocion ta un parti masha importante, aki algun luna lo tin Mundial, cu ta parse cu ta drumi ainda pero pronto lo ranca sali masha fuerte mes, dicon hende ta sinta mira un deporte? Pa e emocion cu esaki ta produci, tin climax den emocion, rabia, tristesa, goso etc pero hende gusta emocion, esaki Leopoldo a causa ora el a entrega su mes na autoridad. Su siguidornan, tur nan emocionan awordo toca, ora a mira e potret di su 2 yunan chikito y su casa, un famia cu awor ta cuminsando  y e tata mester bai prison, esaki a crea un emocion cu miles awordo toca, tambe mi persona, media  internacional a cubri e momento aki masha hopi mes y riba whatsap/Facebook/twitter e potret aki a bai viral masha lihe door cu e momento aki a crea un emocion masha fuerte. Scirbiendo esaki mi tambe ta sinti e emocion ey, vooral si pensa riba e yunan cu mester mira nan bai cu nan tata, algo masha fuerte. No tin nada mas fuerte cu emocion y esaki mester wordo sinti den loke bo ta promocionando pa asina e por gara atencion, si no tin emocion bo ta perdiendo bo placa.

Dispuesto pa sufri fisicamente pa loke e ta kere den dje:  No tin ningun exito sin sacrificio fisico, no ta existi, ta imposibel cu Michael Phelps  por a gana asina tanto medaya di oro den weganan Olimpico sin sacrificio fisico. Menos soño, mas oranan trahando, bishitando mas cliente, mas reunionan pensando strategianan nobo, inverti den educacion y siña tur anochi pa sierto temporada, keda sin come sierto cuminda door cu ta malo pa bo, keda sin bai sali, tur ta sacrificionan fisico cu ta fundeshi pa exito. Cada persona cu ta doño di empresa, manager, bendedor, loke sea, mester ta dispuesto pa sufri fisicamente pa logra e meta, Jesus a sufri na crus y te ainda nos ta kere den dje, door cu El a bai te na ultimo y entrega Su mes fisicamente na crus, dus no por descarta e importancia fisico si kier logra exito den loke bo ta hasiendo. Leopoldo awor ta sufriendo fisicamente, sera den prison(20 di Feb) , sin su comodidad, comiendo cuminda di prison, pasando miedo como humano, sin su famia, pero pa e logra su meta, y tur loke e ta pasando den dje pa e plataforma cu e mester pa logre. Empresarionan mesun cos, no ta existi ningun exito empresarial sin sufrimento fisico, bendedornan mester sali fisicamente riba caya pa bende, managernan mester cuminsa subi caya pa mira kico ta pasando pa asina haña un mihor idea con pa aumenta benta den e Mercado di awe, esun cu ta dispuesto pa sacrifica su mes fisicamente lo logra su meta y esey mi tambe kier pa abo logra tur bo metanan.Blessings Steve

Si bo persona a lesa te cu akinan mi kier felicitabo y jamabo danki pa bo tempo pa lesa loke mi a scribi awe y lo ta great di tende di bo tambe, Steve

stevefrancees@hotmail.com  www.stevefrancees.blogspot.com (297) 7380777

Sales Certification Course: March 10^th Casa Del Mar Beach Resort (7 modules/4 weeks/Final exam):Papiamento

Marketing Certification Course: March 6^th Casa Del Mar Beach Resort (5 modules/3 weeks/Final exam):Papiamento

 

Neo-Marketing, loke nos por siña di e problema di Venezuela

Neo-Marketing, loke nos por siña di e problema di Venezuela

Scirbi pa Steve Francees, Marketing Consultant

Awor rond mundo e situacion di Venezuela ta conoci y esey no ta pa medianan tradicional, door cu esakinan awordo kita, asta canalnan riba cable-TV awordo kita pa asina no pasa e informacion real di e situacion di Venezuela. Mi no kier bai den politica, tampoco duna mi opinion pero kier pone enfasis riba e structura Neo-Marketing cu ta wordo usa cu ta dunando su cobertura cu a surpasa medionan tradicional. Nos tur sa e impacto cu social-media tin y mi ta kere cu hopi empresanan no ta usando nan media social efectivamente y ta jammer door cu esakinan ta neo-tactics cu por tin tremendo efecto riba e promocion di loke bo ta bendiendo of servicio cu ta dunando. E fout cu empresanan ta hasi,  ta promociona e producto of servicionan den social-media manera den Facebook,nan ta ”traha un aviso cu potret di e producto”y post esaki, keriendo cu prospectonan lo “like” nan aviso y na final reacciona,  y hasiendo asina, lo no tin e cobertura y atencion den facebook.Hendenan  ya no ta “like” mas manera dos aña pasa! E mester ta echt hopi bon pa asina  e “like-nan” por subi.  Pero e aviso of post, mester crea atencion rond di dje manera un noticia of un informacion unda e prospectonan por siña di dje y despues presenta loke bo kier bende. Pa duna un ehempel, e mihor propagandanan ta cuminsa cu un storia, incorpora cu imagenan cu ta gara bo atencion, y ta lanta bo emocionan, kisas lo lagabo hari, of hasibo curioso of e storia ta hincabo den un sierto sentimento  pa despues na final presenta e producto pa djis algun seconde. A resulta cu e structura aki tin mas impacto y ta crea mas relacion di bo producto cu bo prospectonan, door cu ta capta atencion prome y despues ta presenta e solucion cu ta e producto mes.  Neo-Marketing ta usa medionan social y crea atencion general, despues relaciona cu e prospecto y si e prospecto sinti su mes involucra cu e storia, direct e structura di neo-marketing ta conecta cu e prospecto y lo sigui na final pa jega na e climax unda e prospecto tambe por reacciona pa asina kier tin e producto ey. Neo-marketing ta un proceso cu ta cuminsa den educacion, relaciona,conecta y na final bende e producto/servicio. E structura aki no por wordo altera, pero si hasi’e lo tin su beneficio den e Mercado di awe. Esey nos por mira den loke ta pasando awor na Venezuela cu e e rednan social ta wordo usa pa transmiti informacion y  esaki ta bayendo hopi rapido. E informacion ta wordo pasa di hende pa hende y asina ta crea un netwerk masha grandi mes y ta bira sumamente efectivo den promociona un informacion. Neo-marketing lo sigui bira mas fuerte tur dia y tur marketers mester inverti mas den dje. Loke ta hasi neo-marketing caro ta e tempo cu ta wordo hinca den dje y esey ta costa placa, pero ta e invercion cu mester hinca den dje pa asina e por funciona. Neo-Marketing ta e plataforma pa mercadea cualkier producto, mi no ta bisa cu mester cancela medianan tradicional, pero mester balansa e budget y inverti den Neo-Marketing.  Neo-Marketing tin un cacacter hopi humano door cu mester jega serca e prospectonan riba un base social, dus mester por relaciona cu e prospecto prome, dus propagandanan mester wordo humanisa lo mas posibel pa asina tin un relacion mas profundo y cu interes di e prospoecto. Durante di 16 aña trahando como  Sales & Marketing Manager, mi a ripara y a biba e cambionan aki, structura y strategia cu nos tabata usa tempo di Consales, promocionando 52 liña di productonan, ya no ta asina mas y no tin su efecto mas manera antes, cos a cambia y awor ta Neo-Marketing y tambe bendedornan mester bai amplia nan mes den Neo-Sales of Neo-Benta. Structura di Benta y Mercadeo a desaroya y e evolucion  aki ta den su peak awor den 2014 y mester gara e concepto nobo aki cu dos man pa asina por keda competitivo den nos mercado cu cada dia ta desaroyando y cada empresa mester desaroya prome cu e mercado-prospecto desaroya. Blessings Steve

Si tin pregunta of observacion por mail mi libremente, stevefrancees@hotmail.com www.stevefrancees.blogspot.com  (297) 7380777

Producto bieu den bachi nobo!

Scirbi pa Steve Francees

Tabata manera 15 aña pasa cu mi tabata na Miami pa un expo y ora mi a drenta Starbucks mi a ripara cu tur e empleadonan tabata hopi jong, dus hobenan bou di 21 aña di edad. Direct mi a pensa kico por ta e strategia cu nan ta usando door di usa hobenan pa bende cofi. Mi conclucion ta cu cofi normalmente ta wordo mas bebi pa hende ya madura dus grandi, wel esey mi wela tabata bisa cu mucha no ta bebe cofi, y pero awor ta mas cu logico cu si bo kier bende algo pa target-market, bo ta usa mesun age-group di e target-market, pero den e casoaki tabata net robes. E conlucion ta cu nan kier atrae e target-market di hobenan, e Mercado mas hoben y ta usa e bendedornan pa atrae e mercado hoben aki cu ta masha grandi.Awor e Mercado hoben tambe ta sinta bebe cofi algo cu algun añanan no tabata normal. Cofi ta un producto masha bieu pero treci den un bachi nobo y ta ganando hopi mercado. Aki na Aruba tin bon cofi manera, coffee house,Checkmade Coffee, Trade Winds,Kings Coffee,Coffee for U,Juan Valdez, Starbucks y tambe Brownies & Goodies. Tur tin un esfera diferente y bo ta topa otro tipo di hende den nan, pero nos cofi aki na Aruba engeneral ta hopi bon den calidad. E Mercado gusta experimenta cosnan nobo, mira cosnannobo, saboria smaknan nobo, y no kier mira mesun cos semper, esaki ta fadanan sin nan sa y akinan e trabou di crea strategianan nobo pa laga un producto bieu mustra trendy ta bira sumamente importante. Cada 70 dia mester tin cambio den e interior di bo negoshi, cambia e structura paden, re-decora e interior, pone artefactonan cu ta mustra cambio, tin asina cambionan chikito cu por hasi cu pa e cliente ta mustra masha grandi, pero ta cambionan cu ta mustra diferente. Asta e shelfs por wordo cambia di posicion, pone avisonan nobo paden, verf un muraya, cambia e saconan cu ta wordo usa pa pone cos den dje, pone musica, traha seccion nobo den e negoshi. Tambe den conceptonan di marketing, cambia e patronchi di 10 aña pasa y kibra cu e unico manera di design aviso, cambia e bosnan cu ta wordo usa den spotnan, hasi cambionan den e profile-picture di Facebook y cuminsa usa otro socialmedia pa asina duna un cambio den e imagen di e empresa. Bendedornan mester usa otro technicanan pa presenta nan mesun producto/servicio, duna e imagen cu ta un cos nobo e ta, y tur esaki ta den e cambio di e manera cu e ta wordo presenta, cambia e presentation-folder, re-design e letterhead. E siman aki lo bo mester check bo producto/servicio of mercancianan y bini cu strategianan nobo pa hincanan den un bachi nobo pa asina bo por keda impreciona e clientenan y manera un cliente gusta cosnan nobo lo bo tin chance di bende astra mercancianan cu tin basta tempo para riba shelf. Dus cuminsa e siman aki bistiendo loke bo ta bende den un bachi nobo. Blessings Steve, Marketing Strategist.

(297)7380777 stevefrancees@hotmail.com www.stevefrancees.blogspot.com pa pregunta of sugerencia por contact mi libremente!

E stobacion #1 di bendedornan y con deal cu ne!

E stobacion #1 di bendedornan  y con deal cu ne!

Scirbi pa Steve Francees

Ta masha fasil pa cay den un zona confortabel y keda aña aden y aña afo den dje, pero tur cu ta den su zona comfortabel  awor, ta perdiendo awor den nos Mercado actual cu ta desaroyando masha lihe. No depende riba exito di pasado, no depende riba bo clientenan so cu ya bo conoce y tin confiansa cu nan. Tin asina cosnan cu por pasa cu lo bo tin chance di perdenan, cambio di pais, otro funcion, muda pa otro cas, caba di casa, accidente, cacho a morde, tanto cosnan cu por pasa, dus e bendedor cu ta traha y bende den su zona confortabel lo sufri. E pakico pa keda den e zona confortabel ta Miedo, si miedo. Un bendedor jen di excus, ta pasobra e ta insigur y tin miedo, no tin otro palabra pa esey. Nos tur ta experimenta miedo den diferente areanan di nos bida y un miedo cu bendedornan ta deal cu ne tur dia ta pa  busca y papia cu prospectonan nobo.  Un bendedor mester prospect tur dia pa asina e por sigui haña cliente nobo y miedo lo tranca e proceso aki y lo reduce benta y tambe di e compania. Mester ta sincero suficiente pa acepta cu miedo a palalisa bo durante di e ultimo añanan y tapesey awor e resultado ta asina manera e ta. Awor si mañan nos kier un otro resultado, nos mester hasi awe loke nos no a hasi ajera. Esey ta logico y e accion ey mester wordo hasi awe y practicamente awor. Aki algun conseho con pa deal cu e strobacion #1 di bendedornan.

Cuida bo palabranan: Palabranan tin masha poder riba bo produccion di bo dia, loke bo papia lo bira realidad, palabra ta bira un echo, sea ta mañan of otro mañan pero sigur cu loke bo ta papiando awe lo bira realidad. Stop di keha di manager/economia/gobierno etc, tur esakinan ta influencianan externo cu bo no tin gara riba dje, pero cuminsa papia cosnan bon, declara cu e dia lo bai ta un tremendo dia, sea agradecido den bo palabranan, declara cu lo bo haña clientenan nobo y nan lo cumpra tambe, declara cu bo ta bunita y inteligente door cu Dios a creabo asina. Papia y declara loke bo kier pa pasa awe, crea un slogan personal y ripiti’e. Prome cu bishita un cliente, declara cu e lo bira un bon cliente y lo bo tin hopi añanan trahando hunto cu e cliente y bo producto lo beneficia e cliente ey grandemente.

Cuida bo actitud: Tin persona cu ta kere cu door cu nan a lanta asina, asina nan ta y semper lo keda asina, esey no ta corecto. Abo tin e unico jabi di bo actitud, ningun otro persona por cambiabo y e great ta cu bo por cambia bo actitud pa un mehor, e simpel echo cu bo ta lesando, esey ta nifica cu bo ta interesa pa mehora bo actitud y bo ta den un esfera pa desaroyo y bai dilanti. Traha un lista di loke a strobabo den pasado door di bo actitud y traha un lista di actitudnan nobo cu bo kier adkeri. Busca un partner den esaki, papia cu un persona di confiansa y bise cu bo kier drecha sierto cosnan di bo actitud y boso lo ta di acuerdo pa traha hunto pa asina e por judabo den e proceso aki.

Cuida bo ambiente rond di bo: 80% di loke bo ta hasiendo, ta loke bo a adkeri di bo cultura y educacion na cas. Tin cultura asina imprimi den un persona cu maske e tin bon estudio ta end-up hasi loke su cultura a siñe. Revisa cual custumber ta strobabo awor y kendenan cu ta rond di bo ta un estorbo pa bo progreso,si den bo personanan di confiansa tin hendenan negativo, esey ta nifica cu abo tambe lo hereda sierto % di negativismo  ora e ta serca y como bendedor si tin amigonan negativo rond di bo, esey ta nifica cu su influencia ta hopi fuerte. Awor tin hende negativo cu bo no por evita di no tin contacto cu nan, esey ta depende di abo keda firme den bo auto-motivacion pa no laga ningun hende dicta negativismo riba bo. Ora e bin cu cosnan negativo, tende, hari y bisa den bo mes, esaki no ta pa ami.

Accion ta e unico opcion cu tin pa sali padilanti, no tin otro y bendedornan mester sa cu e unico antibiotica pa miedo ta accion y sigui persevera den accion. Tuma accion di bishita prospectonan nobo, presenta bo mes na prospectonan cu ta papia otro idioma,otro cultura,otro mentalidad, no tene miedo, djis hasi’e, no laga nan jamabo, abo bai serca nan, no sinta warda te ora e producto nobo jega, cuminsa pre-sale cu loke bo tin, aserca hendenan cu ta puntonan clave pa asina bo por jega serca e persona cu ta tuma decision, accion ta core cu tur miedo y accion mester bira e meta, tur dia mester tuma iniciativa nobo y den e Mercado cu tin asina hendenan nobo cu ta den posicion-nan clave pa tuma decision, bo mester aserca nan, crea amistad, relacion, pa asina lo jega di bira cliente. Awe ta e dia pa tuma accion, loke tabata riba mesa hopi tempo caba, awe ta e dia pa pone den accion. Blessings Steve

Masha danki pa tur cu ta reacciona, comentario y tremendo obsevacion tambe. (297) 7380777 stevefrancees@hotmail.com www.stevefrancees.blogspot.com

Tambe danki pa 3430 biaha cu mi blog awordo lesa y abo sigur ta un di nan! mi intecion ta cu bo tambe por pone nan den accion! Steve

Smartphone por ta matando productividad y calidad di servicio

Smartphone por ta matando productividad y calidad di servicio

Scirbi pa Steve Francees

Bo tabata sa cu cada bes cu bo mira bo smartphone, pa check bo whatsap/facebook asta inbox, ta kita bo enfoke y lo corta bo productividad? Tin hopi persona ya ta adicto na “keda den contacto cu loke ta pasando”, nan mester ta na haltura riba tur loke pasa, sea ta comentario, ken a pone cual potret riba FB,check potret di hende riba whatsap, tanto cos cu pa nan ta importante, pero loke ta cu tur e cosnan aki ta kitando bo enfoke riba loke ta prioridad pa no logra produci loke bo mester produci. Djis mira rond, na trabou, na dokter, den reunion, casi tur hende ta riba smartphone, nan tey presente pero nan concentracion no tey hunto cu nan curpa. Hende no por hasi mil cos pareu, bo mester duna bo concentracion riba loke ta prioridad na e momento ey, si no bo ta termina bo dia sin logra ningun meta. Un persona cu ta constantemente riba su cel no ta siguiendo su agenda, pero agenda di “otronan” cu tin su atencion. Bo ta den un reunion di trabou, kico ta mas importante na e momento ey? Ta e reunion, esaki ta depende di bo futuro, di bo mes, bo famia y henter e compania, dus ta un falta di respet cu tur hende ta mirando nan cel cada 5 minuut, falta di respet pa bo mesun trabou y bo coleganan. Esun cu ya ta adicto na “redo” riba smartphone, no ta realisa esaki y ta rabia ora un persona hala su atencion, pero esaki tambe no ta profecional y ta falta di etica. Famianan ta sinta na mesa den restaurant pa come y cada un ta riba un smartphone, un ta putra e otro”kico bo kier come awe? contesta: aammmm, esaki…ok, wel, te eynan e comunicacion a jega, asina ta mata tempo asina importante cu nunca lo bini bek. Tin bendedornan cu ta check nan cel dilanti di cliente, increibel, un bista masha mahos, of techniconan cu ta bai duna un servicio ta cana drenta serca e cliente cu cel den man y nan ta kere cu esey ta masha den style!. Of e persona cu ta hasi delivery ta cargando cahanan cu cel den man, manera esaki ta parti di nan trabou!. Smartphone ta hopi util y necesario pero e momento cu smartphone bira un adiccion, eynan e problema lo bira mas serio. Ami ta kere cu companianan mester hinca e uso di smartphone den nan regla di trabou (No mester stop empleado pa no use) pero mester tin regla pa cuida e persona pa no bira adicto y tambe pa e calidad di servicio no baha door di adiccion na smartphone. Ta efectivo na trabou ta birando tur dia mas importante, vooral cu e Mercado ta exigi mas di tur trahador y no por laga e uso di smartphone baha e productividad di e compania door cu cada bes e empleado su concentracion ta wordo interumpi door cu mester “check” su whatsap etc. E problema aki ta asina serio cu ya a bira un menasa pa productividad den e operacion di cualkier empresa y mester tuma pasonan pa evita cu calidad di servicio ta wordo perhudica door di tanto adictonan na smartphone na trabou.Ban pone como meta pa e dia di awe pa nos mes ta un ehempel prome y tambe juda adictonan sali for di nan adiccion cu asina no stroba e operacion di ningun organisacion y nan desaroyo personal. Blessings Steve (297)738-0777 stevefrancees@hotmail.com www.stevefrancees.blogspot.com