Cansa di benta abou? Usa e strategia di entrada-salida!!!

Scirbi pa Steve Francees

Den e luna aki tur empresanan ta pensando con pa saca mas probecho di e ultimo dos lunanan cu a keda di e aña aki y pa asina por sera aña cu ganashi y tin cu ta bringa pa break-even. Den luna di September ultimo mi a scirbi con e economia lo mira cambionan den e efecto di pre-eleccion y mi a haña hopi reaccion cu tambe a pasa asina y tin empresanan cu tambe a hasi cambionan na ora pa no a sufri e bahada di e competencia cu eleccion. E strategia di awe ta hopi efectivo pa negoshinan den “retail” dus ta bende productonan den un edificio. Den psicologia di benta tin dos accion masha importante, entrada y salida, con ta trata e cliente na entrada di e negoshi y ora e sali di e negoshi, esakinan ta e fundeshi di un excelente servicio unda e cliente lo keda bini bek pa cumpra na e negoshi ey, asta si e prijs ta mas caro cu e otro.

Aki fayonan grandi ta wordo hasi cu ta causante di un cash-flow abou, mayoria empresa ta pone atencion riba e parti mei-mei di e sales-pitch, dus e climax di benta ora ya e person ta paden di e negoshi, pero a resulta cu esey no ta suficiente, anyway ban riba e strategia di entrada y salida.

Unda e cliente ta para su auto?, akinan tur ta grita “den parlinglot” y esey ta corecto, bo sa cu parkinglot mester ta bo strategia #1? Den cual sentido!, wel akinan ta e prome encuentro cu bo negoshi, si e parkinglot no ta sigur, bo por lubida cu e cliente lo para su auto den dje!esey ta logico, tur empresa,por ta loke sea e empresa, pero tur cu tin un bon parkinglot ta considera di tin bon servicio y e cliente lo paga loke sea pa drenta y cumpra den e empresa, esaki ta pasa hopi na restaurantnan di calidad, unda prijs no ta e problema pero servicio ta conta. Of asta si tin seguridad den parkinglot, pa cuida e autonan y si e personal di seguridad tin super bon manera y ta duna bon servicio, esaki lo genera hopi mas entrada pa e empresa. Ofertanan “jugoso” of “Juicy” mester wordo poni den parkinglot, crea demanda for di pafo, laga e mente di e persona cuminsa bende su mes for di e momento cu e drenta den e parkinglot. Pone banner di super ofertanan, y trahanan grandi, no spaar riba material, mas grandi nan ta, mas impactante nan lo ta den e decision den e mente di e prospecto pa cumpra. Vooral hende muher, ora nan mira un oferta “juicy” ta direct nan ta bisa “Ai, Papi, ban mira kico e ta”y e homber ta hala un rosea y trek su cara un tiki, pero toch ta drenta tras di e muher. Esaki tambe ta conta pa e fachada di e empresa, fachada lo trek of core cu cliente. Manera e prospecto drenta e negoshi,direct mester tin un atencion pe, hopi ta bisa cu mihor laga e prospecto cana trankil, pero mester ofrece algo, e atencion aki pa e prospecto ta simbolisa cu bo tey pa juda, no sali bisa “ala orden” esey ta core cu prospecto, e palabra aki ya ta “outdated” wel aki na Aruba esey a muri hopi aña pasa, y a mata hopi oportunidad pa comunica. E persona cu ta bende no mester bende! E mester juda, soluciona e problema cu e prospecto tin, mester ta un consehero y esey mester sosode durante di e entrada den e negoshi, den e prome secondenan. Den climax di benta, ta bisa cu e prome encuantro ta 80% di e benta mester traha riba e entrada aki, pone enfasis ta train empleadonan/bendedornan riba e importancia di e entrada.

Wel y e di dos ta salida!, akinan supermercadonan por score masha halto mes, si nan train e “pakker-nan” pa actua mas servicial, smile cu e prospecto, jama e cliente danki pa cumpra serca nos, juda e clientenan cu mas rapides y entusiasmo, pero cu respet, sigur e cliente lo keda masha contento y lo kier bini bek door di e ultimo servicio di calidad cu el a haña. Mesun cos ta conta pa net prome cu e cliente of prospcecto sali di e negoshi, mester tin un super trato pe, e ultimo imagen lo keda den su mente y basa riba esaki lo sigui traha riba dje pa bini bek y cumpra loke e kier, si e no tin placa e ta bin majan bek cu e placa door di risibi bon servicio na entrada y salida di su bishita na e negoshi. Nunca laga un prospecto bai sin dune nada, kisas un sample di algo, un coupon pa jena, un folder cu mas productonan,tur loke ta informacion balioso y “cosnan” gratis pa e prospecto, lo crea un relacion in-direct hopi fuerte cu e prospecto, mester mira esaki manera un simia cu ta wordo sembra den e prospecto cu pronto lo crece y duna su fruta cu e prospecto bira un cliente y keda tambe un cliente. Cuminsa awe pa pone e strategia di entrada-salida den funcion, Blessings Steve

Masha danki pa bo reaccion stevefrancees@hotmail.com (297) 738-0777

Mercado mester di personanan cu capasidad pa lidera y no pa maneha.

Scirbi pa Steve Francees

Si analisa e Mercado actual bo ta haña cu tin demasiado manager y no lider cu por lidera e proceso pa asina e compania of organisacion por tin un futuro aki 3 pa 5 aña.  E manager ta administra y cuida loke tin conhuntamente cu su grupo di otro managers y supervisors,nan ta pone meta pa subi benta basa riba realidad di benta di e añanan pasa y tambe tin e precion di accounting pa spaar placa na mesun momento, hopi ta confundi esaki cu top management of board of directors. Pa cualkier empresa of organisacion move sanamente mester tin un structura bon hinca den otro unda ta sincronisa componentenan di liderasgo y maneho. Na un manera simpel, por bisa,liderasgo ta pone e rumbo y direccion na unda e empresa mester bai, unda lo mester jega aki 3 aña y tambe ta tuma desicionan radical si mira cu e rumbo y direccion cu ta bayendo no ta logrando jega na e meta. Un lider por tuma un decision cu asta mayoria di middle-management lo no compronde, menos e trahadornan, pero nan ta mira mas lew cu nan nanishi y ta tuma decision awe pa salba e barco di box contra un iceberg den futuro sercano. Un lider por hole kico ta e cambionan cu lo por bai bin y ta door di esey tambe mester tuma decision pa alinea e direccion di e empresa.  Aki algun punto cu por juda e proceso di liderasgo.

1.      Crea espacio pa bini hunto pa papia riba ideanan nobo, cambionan den e Mercado pa asina tin un bista di e estado actual di e Mercado. Informacion actual ta e componente #1 di tur lider y e mester haña esaki di diferente fuente pa e por tuma un decision basa riba su intuicion di liderasgo.Cu informacion di un banda so bo no ta gana Guerra, esey tur lider sa. Reunionan den ofisina cada dia ta birando menos popular, door cu resultado a mustra cu ideanan nobo ta bini ora tin menos precion y e sitio ta hunga un rol masha grandi mes.

2.      Visualisa con lo bai ta den futuro, visualisa otro majan prome cu majan. Ora e lider pre-mira otro majan, lo e mira un imagen hopi mas grandi cu normal y esaki por spanta cualkier persona den e empresa,accounting,banco y stakeholders etc pero un lider tin e capasidad pa pre-mira y visualisa e estado di e empresa den futuro.

3.      Busca excelencia den servicio na e cliente, un lider mester mira con e cliente kier wordo sirbi majan, prome cu e cliente mes sa di esaki. Loke ta lanta un empresa ta e calidad di servicio na e clientenan. Un lider por visualisa e experencia “waw” di e cliente.

4.      Lider ta crea ambiente di cambio den un empresa of organisacion, corda cu un empresa ta manera un ser bibo, cu ta sinti, tin emocion y tambe mester wordo educa, dus mester incentiva un cultura pa adapta na cambionan. Aki na Aruba e cultura aki di cambio ta sumamente importante pa traha riba dje, hopi di e personal no kier cambio y ta tranca esaki ora jega asina lew cu mester bon cambio, dus lo mehor ta cu mester educa e personal y management poco –poco pa bai den direccion pa adapta na un cultura di cambio constante. Un cambio no necesariamente lo mester mira un adelanto direct, asta un cambio por manda e empresa un stap atras pero majan lo ta tres stap dilanti, y esaki ta difisil pa cualkier personal compronde door cu nan ta buscando un supuesto seguridad.

5.      Usa competencia pa bo beneficio, competencia ta sano y tambe hopi biaha ta hopi bon y bo mester usa esaki pa abo duna mas ainda pa pre-mira e futuro. Usa competencia su actividadnan pa pone mas gasoline tras di bo liderasgo, bira un lider mas eficas, siña mas di liderasgo, y aumenta bo intuicion pa pre-mira futuro.

6.      Crea un cultura di buskeda y accion, crea espacio pa tuma decision, incentiva middle-management pa busca informacion y detayes di loke ta pasando den e Mercado y dunanan oportunidad pa tuma decision tambe y para nan tras ora “cos” no sali manera a spera. Mi tabata na Israel pa casi un luna y a bini 2 dia pasa y mi a mira esaki masha hopi mes, nan ta confia den hende y ta dunanan oportunidad pa maneha na edad hopi jong y tambe ta incentiva nan pa busca alternativa y pa tuma accion, mira e oportunidad y actua riba dje. Mi a topa un hoben di 20 aña cu ta commando di ehersito cu tin 3 persona bao di dje y tin un tanki di Guerra bao di su responsabilidad, ya Doron sa maneha y duna ordo na e edad di 20 aña.

7.      Un lider ta crece hunto cu su grupo, Napoleon tabata sa nomber di tur e casa y yunan di su ehersito y tabata papia cu nan individualmente, y su ehersito tabata dispuesto pa muri luchando pa Napoleon. Un lider di empresa mester sa hiba su personnal dilanti tambe, bin cu iniciativanan cu ta incentiva excelencia den e trabou, un  trahador bon trata ta duna 57% mas di rendimento y esaki lo aumenta cashflow di e empresa y un lider sa di esaki y ta crece hunto cu su personal completo, blessings Steve.

(297)738-0777 /whatsap)  stevefrancees@hotmail.com