E palabra ta y lo keda “persistencia”

Scirbi pa Steve Francees

Tabata antes cu por a djis jama un cliente na telefoon y close the deal of via un fax y cliente tabata firma y manda bek y asina sera e benta, pero no ta asina mas. E Mercado actual ta rekeri mucho mas di cada persona cu ta atende cliente, cada dia bo mester ta mihor cu ajera. Technicanan cu tabata usa antes ya no ta funciona mas, dus pa e personanan cu no kier cambia, lo bira difisil pa nan por funciona den e Mercado actual, cu tur dia ta experencia cambionan bastante formal y no a keda nada mas di desaroya paralelo cu e Mercado cu ta desaroyando cu velocidad di lus. Tin un componente cu tur dia ta birando mas importante den tur loke bo hasi y sigur ta conta pa tur persona cu ta traha den benta y esey ta “Persistencia”. Awor bo mester ta 10 biaha mas persistente den e mercado, cada persona tin 7 NO den su mente pa loke bo ta presentando, dus bo mester neutralisa e 7 No cu 7 Si, pa bo djis neutralisa esaki, dus ta di 8 Si, lo bo mester logra pa bende bo producto of servicio. Esaki no ta fasil, door cu mayoria hende ora e clente bisa No e prome biaha,ya nan ta lanta bela bai y cuminsa keha cu no tin placa cu ta circulando na Aruba, pero cosnan a cambia, bo mester ta mas persistente, esun cu no persisti lo no logra e meta, y esaki ta tambe den tur aspecto di bida.

Jammer cu na scol no tin un vak cu ta train nos hobenan persistencia, dus dedica solamente na e punto aki, door cu nos Mercado ta exigi persistencia pa logra loke bo kier. Empresanan ta perdiendo hopi placa door cu e personal cu ta atende cliente no ta persistente, no ta duna e extra atencion cu mester pa e prospecto cumpra loke nan ta bendiendo, persistencia den duna bon servicio, persistencia den mantene bo lugar di trabou limpi, persistencia den sigui hasi loke bo ta hasiendo te ora bo logra hasi’e bon,persistencia den sigui studia ora tur otro ya no kier sigui, persistencia pa para traha bo 8 oranan di trabou y cumpli cu loke e hefe ta rekeri. Persistencia no ta un teoria pero lo logra su meta ora pone den practica, e mercado actual kier traha cu specialistanan y pa bo specialisa den bo area bo mester ta persistente, no tin otro opcion, cosnan ya no ta bin dimes, abo mester sali buscanan y persisti te ora bo logre. Pa un persona logra ta persistente, mester cuminsa cu un decision, y decision ta e comienso di persistencia, dus tuma e decision di logra loke bo kier logra, hasiendo loke sea pa logre, si bo mester bai bo so, so be it, dus un decision. Sales Managers,supervisors etc tin un trabou sumamente importante cu ta inspira e grupo pa asina ta persistente, nan mester ta un ehempel pa asina nan grupo por mira cu Si ta posibel pa logra e meta pero mester ta persistente. E manera di pensa den e cultura di trabou mester cambia y intencionalmente mester scohe pa ta mas persistente  y esaki ta un proceso cu mester wordo cultiva.

E Mercado ta exigi bendedornan mas persistente, mester bai y bai y si mester bai bek serca e cliente, bo mester bai bek, duna un excelente servicio pa asina bo por logra e benta, no tin otro opcion. E negoshinan di multi-nivel ta bon den esaki, nan ta hasi reunion, motiva nan miembronan, duna incentivo,crea gruponan chikito y un ta pusha otro pa logra bai dilanti y tur esaki ta rond di e palabra Persistencia. Despues di decision, e palabra net prome cu persistencia ta rutina, ningun persona ta gusta rutina, tur hende gusta cos nobo, y nan no ta perfeciona loke ya nan tin, y rutina ta e base pa bo perfecciona bo habildadnan y akinan hopi ta cay afo door cu no gusta rutina, nan no kier bai, bolbe bai y sigui bai hasi mesun cos, pero esun cu persisti den e rutina lo logra su meta, pa despues e otronan puntra ta con bo a hasi’e, y tabata djis ta persistente den e rutina,  no tin otro opcion y Aruba su Mercado actual ta exigi persistencia den tur loke bo ta hasi.

Relato scirbi pa Steve Francees pa DIARIO (11 di Juli 2013)

Danki pa tur e comentarionan! Blessings!

E importancia di Aftersales!

scirbi pa Steve Francees::

Hopi esfuerso ta wordo hasi pa asina por haña un cliente, ta inverti den propaganda y ta hasi cambionan necesario pa atrae cliente. Ora logra bende e cliente, e dia ey tin fiesta door cu supuestamente a logra e meta di bende e cliente y akinan e fout ta cuminsa y den hopi empresa esaki ta un eror structural door cu te eynan e proceso y relacion cu e cliente ta caba y ta bolbe pone prioridad con pa logra haña mas cliente. Esaki ta bira un ciclo cu ta exigi hopi energia y placa pa bolbe cuminsa e proceso pa busca clientenan nobo y ta lubidando e importancia di aftersales. E relacion cu e cliente no por caba despues di e prome benta pero eynan ta cuminsa un oportunidad pa crea un cliente pa bida largo, ta mas fasil pa mantene un cliente cu busca un cliente nobo. Tambe un cliente contento y satisfecho lo conta minimo 3 otro di su amigonan di e bon servicio cu e ta hañando y esaki lo genera mas confiansa den e clientela pa bo empresa, akinan e mouth 2 mouth ta cuminsa y ta wordo considera un di e strategianan di mercadeo di mas poderoso, ora un amigo conseha otro amigo pa cumpra algo. Mercadeo di multi-nivel ta basa riba e principio aki y tur esakinan por wordo gana si hasi afterrsales un prioridad y crea un structura cu ta juda den e desaroyo di aftersales. Corda cu relacion ta keda e basa di confiansa y mester sigui mantene e relacion cu e cliente pa asina e cliente keda afilia cu e empresa.

Tin un comerciante hopi exito aki na Aruba a bisa cu for di prome dia cu el a habri su portanan a disidi di bende su clientenan pensando con e por logra cu nan por cumpra semper serca dje y despues di 17 aña caba, mayoria di e clientenan ta clientenan di hopi aña, esaki ta un manera di pensa y traha un structura pa aftersales, mester saca tempo pa mantene e relacion cu e clientenan, bendedornan vooral ta hasi hopi eror den esaki y ta di compronde cu tempo ta birando tur dia mas caro y mester inverti esaki bon, pero e relacion cu e cliente existente mester pone como prioridad y esaki no mester ta complica. Un jamada di telefoon, un carchi di BBQ, un pen special riba un dia special, un reunion na un sitio, un bishita personal riba un ora no di benta, un yu a gradua y jama pa duna pabien, e lista aki ta sigui.

Mester structura aftersales como un exigencia den e structura di trabou, dus diariamente mester saca tempo pa atende y busca strategianan con por mantene e relacion cu e cliente y ideanan por bini di tur persona den e empresa, no djis di marketing y sales, si compronde e beneficio cu aftersales tin y pone den practica, sigur lo bo mira un aumento den cashflow y lo genera mucho mas clientenan nobo door cu clientenan mes lo manda clientenan nobo, dus e resultado lo ta tremendo. Un strategia cu por usa ta cu mester hasi actividadnan di mercadeo cu ta juda haña mas informacion di e cliente pa asina por conocenan mas, por usa coupon pa jena pa asina bo por haña nan informacion pa sina por contacta nan, tin programa cu ta traha un historial di cada cliente di tur nan informacion, bo ta djis pidi e informacion pa un biaha y sigui update esaki cu tempo, asina por sa tambe con frecuente e cliente ta cumpra y kico e tambe ta cumpra mas y esaki por duna bo hopi informacion con ta su manera di cumpra y su deseonan y necesidadnan.

E Mercado di awe ta exigi cu bo mester mantene un bon relacion cu e clientenan, competencia ta loco pa haña nan como cliente y e unico strategia pa mantene nan como cliente ta pa asina crea un bon relacion practicamente personal cu e clientenan y sigui busca maneranan pa mantene nan como clientenan contento.