Scirbi pa: Steve Francees
stevefrancees@hotmail.com
1. Responde rapido: Ora un
prospecto bini pa puntrabo pa un informacion di loke bo ta bende of ofrece,
move rapido! Un prospecto a bini serca bo sea el a jamabo of a pidi mas
informacion via bo website of a bini personal serca bo, loke sea ta e caso,
move rapido. No prospone prospecto cu kier informacion. Mas liher bo dune un
contesta di loke e persona aki a puntrabo, dus mas liher bo move, mas experto
lo bo aparenta den e sub-conciente di e prospecto. Ora un persona hasi algo
rapido pabo, bo ta sinti cu abo ta importante, unabes cu e prospecto sinti
esaki di bo parti, lo bo gana su aprecio direct. E prospecto ta sinti su mes
bon cu abo ta dispuesto pa jude lo mas rapido posibel.
2. Usa palabranan bunita cu ta anima: Un prospecto kier sinti su mes balora y wordo trata cu honor y respet,
dus bo palabranan, bo forma di traha e frasenan mester ta palabra cu ta anima y
crea honor na e persona. E prospecto na telefoon mester sinti cu bo ta admira y
balore, door cu bo ta usa bo palabranan cu ta crea motivacion y un bon relacion
entre abo y e prospecto. Bo ta na telefoon cu un prospecto, wel, hasi manera e
ta dilanti di bo, hari, hasi bo cara cu exprecion di alegria ora cu bo ta
papiando cu e prospecto. Abo actua manera e ta un persona masha importante mes
pa bo y ta un previlegio pa jude. Bo exprecion di cara ta wordo expresa den bo
palabranan, cu otro palabra, bo palabranan ta vibra e aparencia di bo cara.
3. Trece humor den bo palabranan: Humor semper ta crea e laso di relacion, y ta duna un toke special den e
relacion, den tur loke bo hasi crea espacio pa un humor chikito, no hunga
payaso, pero djis algo chikito cu asta abo so lo hari, pero esaki e prospecto
ta tuma como cu abo ta contento di jude. Dus selecta e palabranan di humor
adelanta y cada bes bo ta test cual ta funciona mihor, durante di algun test bo
tin sierto palabra of exprecionan cu ta crea humor, y bo por keda usa e
exprecionan den e direccion aki.
4. Conseheria: Duna
informacion relevante pa e prospecto, nos a bai come den un restaurant y a bisa
e waiter cu nos kier un sopi grandi pa nos cada un, e waiter a bisa nos cu
kisas esey lo ta mucho grandi pa nos por caba di come y e ta conseha nos pa
come un chikto cu tog ta bastante grandi y door cu ta bini cu mas cos adicional
etc esaki ta suficiente. E waiter por a bende nos mas, pero a scohe pa asina
nos por tin mihor probecho di e cuminda, e no a pensa di bende nos algo cara,
pero a pensa cu otro biaha pa nos bai bek. Duna conseho na e prospecto, dus pa
bo hasi esaki bo mester conoce super bon bo producto/servicio. Saca tempo pa
lesa di bo producto of servicio, pa asina bo por duna un bon splicacion di dje.
Lista tur loke ta practico dib o product/servicio, e prospecto sigur lo aprecia
esaki ora bo dune bon informacion.
5. No confundi e prospecto cu hopi alternativa: Kisas bo tin hopi mas pa ofrece y bo kier
bende tambe e prospecto aki y kier logra di duna lo mas informacion posibel di
otro product na e prospecto. Wel esaki lo confundi e prospecto y por ta cu lo e
no cumpra door di demasiado informacion. Si e prospecto kier un producto, dune
djis algun variedad di e mesun producto pa asina e por disidi cual e kier.
Kisas por dune mas informacion di otro productonan usando un folder etc pero no
trata di bende tur cos den un biaha. Si bo ta sinti cu e prospecto mester di
mas cos y e mes ta puntrando pa mas cos, bo por sigui e coriente aki. Idea ta
pa e cliente aki ta asina contento cu bo cu lo e bini bek, asina bo ta crea
clientenan pa bida largo.
6. Hasi pregunta inteligente: Bo preguntanan mester ta habri pa asina bo por hanja lo mas posibel
informacion di e prospecto, kico exactamente e tin necesidad di e dje, y kico e
kier. Unabes bo sa kico e mester, abo por dirigi’e na e producto/servicio cu ta
jena e necesidad cu e tin.
7. Relaciona emocion cu e producto/servicio: Tur persona ta relaciona tur cos cu nan emocion, un ehempel, cumprando e
artefacto aki, lo sra.. spaar hopi tempo y spaar hopi placa tambe cu sra por
inverti den algo mas cu sra gusta, si bo mira un cadena cu e tin bisti, bo por
bise, wel, sra por cumpra kisas un otro cadena manera esun bunita cu sra tin
bisti. Of tin mas tempo pa comparti cu e yunan y of bai cu vakantie, y akinan
bo ta hari tambe!!!Ora bo ta relaciona e producto cu e emocion, na e momento
aki bo tambe ta bisa si y ta indica si cu bo cabes y bira bo cabes un tiki na
banda, asina aki e prospecto ta aprecia mas bo palabranan cu lo toka su
emocionan y djis hari un tiki.
8. Beneficionan di e producto of servicio: Lista tur e posibel beneficionan cu bo producto/servicio tin, revisanan,
y duna nan durante di bo demostracion, si nan ta hopi, escohe loke e prospecto
tin mas necesidad di tende pa asina tuma un decision. Duna suficiente pa e
prospecto por tuma un desicion racional di bo producto/servicio.
9. Usa personahenan famoso cu ta usa bo producto/servicio: Tur hende ta imita otro y tin un heroe den
nan bida, tapesey propagandanan ta usa imagen den tur loke nan hasi. Bo por usa
nan nomber, no ganja si, si bo sa cu un primo di dje tambe ajega di cumpra e
producto ey, bo por bise esaki, tur ta crea balornan adicional na e
producto/servicio cu sigur lo logra pa bende e producto.
10. Visualisa y actua manera e prospecto ta cumprando: 93% ta lenguahe corporal, asta via telefoon
esaki por wordo sinti, wel Visualisa bo mes cu e prospecto aki cumpra bo
producto y actua den e direccion ey, ora bo actua, e prospecto lo siguibo, y si
e proscpecto sigui bo, bo mester bai na closing pa sera e benta. No tene miedo
den e momento aki pero keda den control, si bo a hasi bo trabou bon den e prome
parti, sigur e parti aki lo ta mas fasil.
11. Puntra pa sera e benta awe: No warda pa e cliente mes disidi di cumpra, abo mes puntre! Si encaso e
tin mas pregunta, bo mester bai bek na bo presentacion y splike kico ainda e
tin duda ariba dje, pero bini bek na closing, bo mester close. Si ainda bo no
por close, bo por puntre kico por ta e motibonan dicon e no por cumpra e
producto/servicio awe! asina bo sa kico ta pasando den su mente. E por tin
varios motibo, placa, su casa no tey, mester bai cu vakantie prome, auto a
danja,no mester di dje awe etc, loke e bisa ta di importancia pe. Si bo por
jude cumpra awe tog, lo bo mester hasi’e, kisas den areglo di pago, of un
descuento, of oferta cu tin riba e producto ey. Semper crea urgencia!.Akinan bo
mester lista tur e excusanan cu bo por hanja y bo mester tin un solucion pa nan
tur. Si bo logra tog pa convence pa cumpra, wel esaki tabata tremendo, pero
pensa cu e persona aki por cumpra otro luna tambe. Corda cu bo kier pa e
prospecto aki cumpra bida largo serca bo!
12. Invite pa bini bek: Den
tur momento,sea e prospecto a cumpra of no a cumpra bo mester invite pa bini
bek, dune informacion pa bai cas cu ne, website, social media ta sumamente
poderoso pa duna informacion. Hopi hende ta riba facebook, dus invitanan pa
check ofertanan riba facebook of otro social media, duna bo business card, duna
flyers di campanjanan cu lo bini otro luna, mustra interesa pa e prospecto of
cliente sigui bini bek y abo lo ta contento di sigui jude den tur loke e tin
mester di dje.
No comments:
Post a Comment