IMPORTANTE: Briya den 3 Puntonan pa BENTA Subi!.

IMPORTANTE: Briya den 3 Puntonan pa BENTA Subi!.

Scirbi pa Steve Francees,

Den tur cos, esun cu briya mas, ta haña mas atencion, e producto cu ta briya mas lo tin 3 biaha mas chance pa bende riba esun cu no ta briya. Esaki tin di haber cu tur tipo di producto of servicio, hende ta cumpra e producto cu ta briya mas y No esun mihor, asina mes “Hende ta cumpra e producto cu ta briya mas y NO esun mihor”. Asta nos Señor Jesus a bisa cu nos mester ta luz di mundo, dus E sa cu esaki ta e secreto pa promociona loke bo ta bendiendo y door di esaki salbacion ajega serca nos te cu awe. Tin tres Perla cu ta parti cu tur empresa mester briya pa asina benta subi.

Prome ta e trahadornan: Bo por tin e mihor producto pero si e trahadornan no briya cu nan servicio y cu nan actitud, lo bo no logra jega target y sigur lo no jega surpasa e target. E prome secreto ta cu e empleadonan, bendedornan, telefonista, delivery enfin, henter e personal mester briya como persona y esaki tin di haber con bon nan ta den nan trabou y si nan ta motiva pa duna e extra pa asina nan por briya, duna un calidad di servicio na e cliente aunke 6pm ajega y ta ora pa bai cas, cacho a morde bisiña, pero toch no ta perde cabes y sirbi e cliente bon, tin un dolor di stoma pero ta trata pa e cara ta contento y bai cas despues cu e cliente a cumpra.

Di dos ta e compania mes: Tur loke ta trata e compania mester briya, cuminsa cu decoracion, logo, business cards, facebook ads etc, tur loke lo pone e empresa riba un nivel bon. Fachada cu e nombernan, nomber riba e autonan di compania, envelop cu logo imprimi riba dje, website/blog, dus tur loke ta laga e compania briya mester di atencion.

Di tres ta e producto: Kisas bo ta pensa, dicon e producto ta di tres lugar? Pero esey ta asina, e dos promenan lo bende e producto, producto no ta bende su mes pero ta hende ta bende producto, hende ta crea e balor agrega cu ta complementa e totalidad di e producto.Briya no ta un opcion pero un obligacion y ta e paso pa logra e exito den loke ta wordo ofreci. Cuminsa pensa strategianan con pa briya awe. Blessinsg Steve

(297) 7380777 stevefrancees@hotmail.com

Concept #1 di negoshi na Bonaire “Maiky Snack”!

Concept #1 di negoshi na Bonaire “Maiky Snack”!

Scirbi pa Steve Francees

Mi a caba di jega for di Bonaire unda mi a duna 3 dia di seminario di lenguahe, expo  y cultura Hebreo “Eretz Yishrael” y tambe Bonaire a celebra “Dia di Rincon”. Ami a bishita Maiky Snack, un sitio hopi famoso pa tur e Arubianonan cu ta bishita Bonaire y djis puntra cualkier cu ajega di bai Bonaire si nan conoce Maiky Snack. Loke ta interesante ta cu Maiky Snack ta keda bastante leu den e area di Nieuw Amsterdam cu ta keda riba e caminda pa bai Lac, dus no ta central. Otro cos ta cu Maiky Snack ta literalmente un cunuco unda bo ta mira carne,cabrito, galiña etc, dus un cunuco cu nada “fancy”. E persona cu ta sirbibo ta bisti normal, e borchi cu e menu di dia ta un borchi normal. E caminda pa jega ta di tera y mester core un tiki pa jega y door cu mi tabatin varios aña sin bai mi a perde door cu mi a lora den un otro caminda y a “end -up” na un otro cunuco.  Pero loke ta obvio ta cu Maiky Snack ya ta un icono masha importante pa tur cu bai Bonaire, bai Bonaire y sin bai Maicky Snack ta manera bo no a bai Bonaire. Pero kico a hasi cu e snack-restaurant aki a bira asina famoso.

Nan ta sirbi manera nan ta: Tin un concepto cu nos tur a siña den nos estudio cu bo mester impreciona e cliente cu bo uniform y tur e concepto mester ta uniforma pa asina mantene un liña den bo design. Facilmente den e concepto aki, bo por cay den un concepto di crea un imagen cu bo no ta, pero na Maiky Snack, e sra cu ta sirbi ta bisti normal, ta saludabo masha amabel, pero no cu tanto “fanfara”, dus actuando manera e ta. Dus un servicio di curason y expresando con e ta como persona. Dus e strategia ta sirbi na un manera hopi humano y normal.

Decoracion y ambiente: Maiky Snack ta un cunuco y manera mi a bisa caba nada “Fancy” cu nos conoce aki na Aruba, e ambiente ta di un cunuco normal cu dak di zim, habri pa asina aire fresco por pasa, stoel y mesa ta manera di cunuco, dus ta crea un ambiente netamente di cunuco y sin mester impreciona ningun hende.

Sitio pa topa hende conoci: Otro cos masha great ta cu na e sitio bo ta encontra hende cu bo ni ta pensa di mira eynan comiendo, y bo por saluda nan trankil y tambe topa amigonan cu ta bini pa come merdia.

E ambiente ta completamente trankil, sin mester pretende nada y djis ta bo mes.

Prijs: Nan prijs tambe ta bon, Bonaire ta usa dollars, pero toch e prijs no ta problema, ami a come sopi di cabrito y mi e come esun grandi, (tin chikito y grandi), y a keda satisfecho cu e prijs di e sopi.

Calidad di cuminda: Wel akinan si ta algo hopi bon door cu tur cos ta fresco, tur dia tin specials di pisca y carni. Patras mi a mira un fogon, dus nan ta cushina usando carbon y sigur tambe combina cu stoof normal, pero e smak di cuminda ta sublime y door cu ta cunuco ta duna un sentido unico cu ta crea un ambiente hunto cu e calidad di cuminda. Ami a keda encanta cu e calidad di cuminda.

Ora cuminda caba, cushina ta sera: Tabata diadomingo cu nos a bai Lac pa despues bai Maiky Snack y tabata rond 3pm, y ya cuminda a caba y nos mester a bai Fogon latino pa come. Pero e enfoke di e negoshi aki ta pa biba trankil, dus nan ta cushina te sierto cantidad di cuminda y si e caba, ta majan bo mester bai bek. Cualkier otro empresario lo kisas traha cushina mas grandi, pone mas koki etc, pero na Maiky Snack esaki no ta e caso, nan ta contento di por bende e cantidad di cuminda ey.

Marketing/Promocion: Hopi di nos ta opta pa pone un borchi asina grandi pafo pa mustra calidad y impreciona, wel Maiky Snack tin algun borchi pa indica unda e cunuco ta keda y parse cu tin hopi aña cu nan awordo poni. Na e cunuco mes tin un borchi cu ami mes no a mire ora mi ajega. Normalmente un restaurant ta usa hopi promocion etc pero ya na Bonaire e nomber ta hopi conoci y djis na radio rond 11am nan ta menciona cu por “lunch” na Maiky Snack. Nan promocion di boca-pa-boca ta masha fuerte mes y esaki ta e mihor base door cu door hende ta sigui recomendacion di otro.

Na final mi por bisa cu Maiky Snack a disidi di hasi negoshi manera nan ta, usando loke nan tin y sin imita ningun hende y esey ta loke ta hasi nan exitoso den e mercado di Bonaire. Blessings Steve

(297) 7380777 stevefrancees@hotmail.com www.stevefrancees.blogspot.com