E mentalidad pa surpasa TARGET!

E mentalidad pa surpasa TARGET!

Scirbi pa Steve Francees

Tin custumbernan cu no ta judabo vooral ora bo ta den benta y mester bende den un Mercado cu ta exigi mucho mas cu ajera, y un di e mal custumbernan aki ta Depende di otro!. No depende riba otro pero depende riba bo mes, si otro no kier, abo si lo hasi’e, si nan no kier duna mas di nan parti, abo si duna mas, no depende di otro pa abo move, pero move riba bo mes. Ta abo tin bo metanan y e unico responsabel pa bo logronan ta abo mes. Jega target no ta un meta, esey ta bo deber, esey compania ta pone pa bo cu ta e mimimo cu bo mester logra, dus no hasi fiesta ora jega target, pero e meta mester ta surpasa e target cu compania a pone, esey Si ta un meta, y un bon meta door cu esaki lo ta bo meta personal. No compara bo mes cu un otro cu ta net jega target, abo ta unico y tin tur e potencial pa surpasa target, pone 10%-20% riba e target y traha pa logre, y esaki ta posibel pa esun cu ta kere cu e por, tur cos ta bo decision, con bo ta educa bo mente pa logra bo metanan. Depende riba bo mes, no laga otro motivabo, Dios a crea nos cu tremendo potencial y segun estudionan hasi, un  persona ta usa unicamente 7% di su potencial, increibel cu tin tanto mas pa logra, dus bo tin e potencial suficiente pa pasa cualkier target cu wordo poni. 

Mercado no ta malo, semper tabata mesun cos, ta con abo ta mire lo bira e realidad di bo mente y lo bo actua tambe asina. No depende riba hendenan negativo pa logra bo metanan,nan ta keha pa tur cos y mas bo cana cu nan,mas atras lo bo bai door cu bo ta garando nan mentalidad y esaki lo no judabo den e Mercado di awe. Awe ta e dia pa hasi un cambio den nos manera di pensa, auto-motiva bo mes, kere cu bo por, tuma iniciativanan nobo,cambia strategia di benta, cambia bo approach, disidi di ta mas contento,mas entusiasma cu bo trabou,mustra empatia cu otronan,lesa mas di informacionan di bo producto y servicionan. Disidi di siña algo nobo awe y no depende riba otro, depende riba bo mes, hasi loke bo mester hasi y pone un extra ariba, un cliente mas, un jamada di telefon mas, un bishita mas, tuma un risico mas grandi awe, hasi net loke bo tin miedo di hasi, unabes cu bo hasi’e, lo bo sinti bo mihor y bo balor-propio tambe ta subi, bo auto-estima lo aumenta, hasi  e extra lo dunabo satisfaccion y hasibo mas productivo, awe ta e dia pa no depende di ningun hende pero depende di bo mes. Corda cu Dios a crea bo cu hopi MAS potencial cu loke bo ta usando, dus ban cuminsa usa mas di e reserva di potencial cu nos tin. Blessings Steve

www.stevefrancees.blogspot.com  (297) 738-0777

Nos ta traha pa Crea y Multiplica

Nos ta traha pa Crea y Multiplica

Scirbi pa Steve Francees

Nos tin tur ingrediente necesario y capasidad pa crea loke nos kier, nos por cambia algo di malo pa bon, nos por supera cualkier obstaculo cu por presenta. Nos por cambia nos estado actual di normal pa uno hopi mihor, nos tin e opcion pa scohe kico mi ta bai pensa riba dje, e poder ey mi tin den mi. Nos tur ta trahá cu abilidad pa crea y cambia cosnan, no tin ningun circunstancia cu no por wordo cambia, tur loke bo por imagina y kere cu fe den dje, por bira realidad! pasobra nos ta traha pa crea y modifica tur loke mester wordo modifica. Nos tin e capasidad pa cambia nos emocion  y scohe emocionan nobo, pa cambia nos emocion y sintimento di ta un perdedor pa un di un vencedor, mi por scohe kico mi wowonan lo mira y tambe mi por crea loke hende no ta mira, pero mi wowonan si ta mire.

Nos ta creá cu tur loke ta necesario pa cambio y mehora nos actititud, pa crea un mihor futuro, un mihor familia y sigur un mihor pais. Dios a crea nos for di comienso di mundo cu e capasidad ey, den Genesis 1: 26, Bijbel ta bisa cu E a crea nos segun Su imagen y semehansa, no segun nos comprendemento cu ta limita, Bijbel ta bisa cu Fe sin obra ta morto, dus nos mester pone den accion tur nos talentonan pa crea y multiplica. Den Romananon 12, Bijbel ta bisa pa cambia boso manera di pensa, no pensa manera e mundo aki pero pa medio di e renobacion di nos mente, Dios a crea nos cu tur abilidadnan pa hasi cosnan y crea cosnan, pasobra Dios ta un Dios creador y E ta gusta crea cosnan bunita, Su creacion ta perfecto y no tin nada cu nos no por crea, E ta cu nos.

Dios a bendicona nos cu tur bendicion Spiritual, pa jena nos spirito cu Su sabiduria pa asina ta fructifero y multiplica(Genesis 1:28). Awe ta e dia pa cambia bo pasado y crea un futuro nobo y esey ta posibel si bo ta kere cu bo por, Dios sí ta kere cu bo por, pasobra ta E a creabo pa asina bo por sigui crea tambe y multiplica, pa cambia y drecha camindanan cu a bai robes, pa pone riunan den teranan seco, pone matanan crece caminda no por a planta den pasado. Ta posibel pa bo crea awe un mihor futuro pa nos muchanan, nos hobenan cu mester di tanto atencion, pa personanan cu ta luchando cu nan self-esteem, hendenan sufriendo di un dificultad fisico of malesa, mamanan luchando nan so lantando nan yunan, personanan cu mester di un judansa pa lanta bek di nobo!. 

Nos tin e poder pa crea y expande horizonte pa esunan cu no tin vicion y habri nan wowonan pa nan mira un mihor futuro. Dios a crea nos cu tur loke bo tin mester pa hasi un cambio pa mehoracion riba e dia di awe!Awe ta e dia, puntra bo mes, kico Dios  kier pa mi crea y multiplica awe? unda E kier pa mi pone mi atencion riba dje? Kico ta e prioridad riba e dia di awe?. Bo tin tur capasidad pa crea y cu Dios Su poder SIGUR lo bo por crea un mihor futuro y multiplica tur loke E a confiabo cu ne!. Blessings Steve 

www.stevefrancees.blogspot.com  Aruba (297) 7380-777

Tin tres grupo di hende!

Den nos comunidad tin tres tipo di hende of grupo di hendenan: Un ta mira "otronan" hasi loke nan ta hasiendo y ta djis para mira, tin un otro cu despues cu e "cos" a pasa ta puntra?pero ta kico a pasa precies?,dus nunca nan no ta pendiente y ta perde e momento y tin un grupo cu ta disidi di "move" bai dilanti y ta traha, pa logra loke nan kier logra, nan no ta worry kico"otronan" ta bisanan, no ta worry cu critica pero ta automotiva nan mes pa logra metanan nobo y busca teranan nobo, nan ta dispuesto pa subi un barco, nabega lama bruto pero cu e meta di logra teranan nobo cu lo tin prosperidad pa nan y nan famia y asta nan generacion. Nos ta disidi nos futuro y ta responsabel di tur loke pasa cu nos, esun cu busca lo haña, esun cu bati lo wordo habri pe, no warda te cu mañan pa bati of busca, tur persona cu a logra metanan extra-oridinario den nan bida a disidi di ta den e di tres tipo di hendenan y awe esaki tambe lo ta nos desicion, den cual grupo di hendenan mi kier ta? y den cual grupo mi ta awor? y si encaso bo ta den e grupo robes, mester tuma un accion pa "schuif" bai den e di tres grupo. E great ta cu bo tin tur loke ta necesario pa opr ta den e di tres grupo! Blessings Steve