Who moved my cheese!

Who moved my cheese, ta un di e mihor bukinan cu mi ajega di lesa, wel a lese segun mi 4 pa 5 biaha !
Ami lo recomendabo pa mira e video aki cu ta solamente 11 minuut! Slds Steve

2 problema cu mester di atencion direct!!

2 problema cu mester di atencion direct!!

Scirbi pa Steve Francees,  Sales & Marketing 

 Ta asina jammer cu comerciantenan ta hinca asina tanto placa den mercancia y cu mester bende pa asina paga gastonan y mantene un cashflow positivo y ta core hopi risico den e Mercado actual. For di Januari e aña aki, e bentanan general a baha door cu e buying power ta menos y sigur esaki lo keda asina te cu juli e aña aki, dus mester traha mas duro pa asina keda “fit” den e Mercado actual, nos ta drentando semana Santa, despues di Mama, Tata y despues Mundial lo tuma tur atencion!!! Lo mester hasi cambionan inteligente y tuma iniciativanan nobo!!!.

 Tin dos problema cu ami ta mira cu mester di atencion direct!

1.       Menos hende ta drenta negoshinan pa cumpra: Si compara antes cu personanan tabata cana window-shopping, esey a bai for di moda, e generacion actual ya no ta den esaki, si mira na e mall-nan ta puro mucha jong bo ta mira anochi ta cana rond y algun turista tambe cu ta djis “hang-around” y algun adulto-local cu ta minoria cu ta cana rond wardando pa nan pelicula cuminsa! Si nan drenta un tienda ta djis pa mira kico mas tin, pero nan no ta den e “esfera” pa cumpra, dus tin masha tiki ta drenta y esaki ta pasando mas y mas, cu hendenan no ta drenta den un tienda asina hopi manera antes. Loke ta pasa tambe ta cu e bendedor(a) ta sinti cu e cliente no a bini pa cumpra, pero shon!!! Ta abo mester bendenan, ningun cliente ta bini ya pa cumpra nada mas! Tapesey e bendedor(a) tey den e tienda, pa bende e prospectonan! Door cu e dianan aki menos hende ta Shop!, no por laga un persona drenta y sin wordo bendi, tuma tempo cu cada persona individual y trate super bon, asina so e lo cumpra. E mesun efecto aki tin tambe den caya y tambe na negoshinan den retail.

2.       Calidad di servicio na cliente no ta riba nivel: Aki mi ta exagera un poco,pero si mi ta kere cu e calidad di servicio na cliente no ta bon. Esaki ta depende di cada tipo di negoshi, si bo ta bende producto y asesorionan chikito, wel bo mester tey constant hunto cu e cliente, prome pa laga e cliente sinti bon, dus cuminsa cu un sonrisa riba e cara y bisa “Bondia,sra” (y please NO bisa “cu kico mi por judabo” bo sa caba cu e ta bisa “mi ta djis wak”) e pregunta di mas kens cu tin esey ta, cu ta sera e oportunidad pa comunicacion habri cu e prospecto, y ta net esey no mester pasa, mester tin combercacion habri cu e prospecto.  Bendedor(a) ta keha cu no tin placa na Aruba,cos ta malo, pero ta nan mes ta sinta papia cu otro y no ta atende e cliente manera mester ta. Den e tempo actual, no por laga un prospecto bai asina fasil, bo mester saca afor kico e kier y bende loke bo tin, si ta paña bo ta bende, lage pas e pañanan, tuma tempo cu e cliente,  bai e extra cu ta necesario cu e cliente, pasobra ta den e extra ey cu bo bai cu e cliente, e lo por cumpra. Ta jammer cu abo laga e prospecto bai y e cumpra na bo competencia.

Blessings Steve  (297) 7380777 stevefrancees@hotmail.com  www.stevefrancees.blogspot.com

***Marketing Cafe, e siman aki.(papiamento)

3 dia di seminario/workshop di SALES, MARKETING & Graphic Designing

27-28 y 29 di Maart, parti mainta di 9am - 12pm.

(Diahuebs-Diabierna y Diasabra awor !!!)

Lugar: Brownies, Goodies & Coffee (na Ponton, Un sitio nobo net banda di Rincon de Maria)

Tur facilitadornan ta profecional den Business Management.

(Material y Certificado) grupo lo no ta grandi pa mihor interaccion!.

Jama 7380777 (Steve) pa reserva of reply riba e mail aki) *See Attachment*

SALES/ Diahuebs dia 27/  9am - 12pm

MARKETING/ Diabierna 28/ 9am - 12pm

Graphic Designing/ Diasabra 29/ 9am-12pm

Un tremendo "Boost", pa siña y "refresh" e personal y surpasa target den e lunanan aki!.

See attachment y jama/mail/whatsapp pa mas informacion.

9 pakico bo ta perdiendo cliente!

9 pakico bo ta perdiendo cliente!

Scirbi a Steve Francees, Sales & Marketing Consultant

1: Prijs a surpasa e balor di e producto.

Prijs ta algo importante  mester tene bon cuenta cu ne mas awor cu internet ta competencia di tur retail store y por haña mihor prijs online. Si clientenan no ta bini bek ta nifica cu nan a logra haña mas balor pa nan placa na un otro sitio y a cambia pa e otro. Corda cu pa tur loke bo ta bendiendo mester di balornan adicional cu lo juda hisa e balor di e producto, asina e cliente ta sinti cu e balor di loke e ta cumprando ta mas halto cu loke e ta pagando. Dus vooral den e dianan aki, busca “cosnan” adicional cu lo subi e balor di bo producto.

2: E nivel di servicio a keda mesun cos of a baha

Servicio ta sumamente importante y mester check e nivel di servicio regularmente, unabes cu e calidad di servicio baha, e clientenan lo sinti’e direct, y kisas lo nan no bisabo pero nan ta djis “trek” cara y no bolbe bek. Kisas e persona cu ta atendiendo e clientenan tin un character poco hostil of ta hopi temperamental. Tambe por ta cu e persona cu tabata duna bon servicio a cambia di posicion y no por atende e clientenan mas. Servicio no por baha pero mester ta algo cu diariamente mester traha riba dje pa mehore.

3: Na un momento crucial, a perde contacto cu e clientenan

Esaki ta pasa masha hopi ora e negoshi ta den desaroyo y ta bezig ta expandiendo, kisas cu construccion nobo, of lantando un otro sucursal of asta e focus a cambia y bo ta perde contacto cu e clientenan. Den e strategia di Marketing mester tin un vehiculo cu lo evita esaki di pasa, no por perde contacto cu e fuente cu ta genera entrada.

4: Bo awordo conseha pa stop of baha man den mercadeo.

Esaki ta straño pero tin hopi “experto vooral den accounting” ta conseha nan clientenan pa baha gastonan di marketing door cu den nan bista ta gastamento di placa, nan ta mira marketing como vet y no como e sanger den e compania. Ami lo conseha pa tuma varios conseho prome cu tuma sierto desicionan den marketing. Si un aviso no ta dunando su resultado, sigur mester corta cu ne, y hinka e placa den un otro strategia pero no corta den bo marketing budget. Siman pasa mi tabata na un sitio di icecream y a topa un Dj cu a bisami cu e la cambia di radio pero ta sumamente importante pa un Dj keda zona na radio, door unabes cu un Dj sali pa djis 1 luna for di aire, ya ora e kier bin bek ta hopi difisil, door cu sponsornan ta cay direct. Dus como compania bo mester keda zona.

5: Inovacion a bira un palabra di pasado.

Un cos cu tur hende gusta ta cos nobo, hende gusta loke ta “in” y esaki ta inovacion den bo empresa, mester tin cambionan inovativo y ami ta conseha cada 40 dia mester tin un inovacion, mester incentiva e personal pa keda inovativo y sigui bin cu ideanan nobo pa asina evita cu inovacion ta wordo mata.  Algo cu ta mata inovacion ta ora bo tin un hefe hopi “bossy” loke e bisa, asina e cos mester bai, si esey ta e caso, shonan cambia e manera ouderwets ey.

6: Clientenan a desaroya sin bo sa.

Hende ta sigui desaroya tur dia y un negoshi tambe mester desaroya, no por keda atras pensa den pasado, e cliente ta crece den edad, e ta casa, muri, un yu ta nace, sobrino a gradua, bisiña nobo, tur esakinan ta bisa nos cu nos Mercado ta den un desaroyo masha pisa. Muchanan ya no ta hunga cu e mesun coy hunganan di prome, loke nan tabata hunga cu ne 5 aña pasa, awor mesun edad ta hunga cu cosnan diferente. Esaki ta desaroyo y tapesei mester hasi research cada temporada pa asina sa e direccion di e desaroyo di e Mercado.

7: E productonan ya no ta den demanda.

Tur bon producto tin su fecha cu ta expira y lo cay  di popularidad y esaki tambe ta conta pa sierto productonan y den negoshi di bistimento(fashion), esaki ta masha fuerte, manera bendemento di auto tin un precion enorme pa bende e auto prome cu e over-year, asina e pasa e temporada ta mas difisil pa bende. *Por inova e mesun producto, door di presente diferente, dus den un bachi nobo pa sigui mantene e demanda. Otro opcion ta busca producto/servicionan nobo pa asina keda den demanda.

8: Empleadonan demotiva

Loke ta hasi mas daño cu tur ta empleadonan demotiva, esaki ta e cancer di cualkier empresa, empleadonan motiva lo crea un atmosfera di progreso, nan lo duna mas y nan rendimento ta optimal, pero ora tin personal demotiva of tin un appel no bon den e grupo cu ta incentiva e empleadonan negativamente, lo tin un menasa bastante serio. No semper ta fayo di e empleado, pero tambe ta fayo di gerencia cu no ta interesa pa motiva e personal of no tin un palabra di estimulo pa e trahadornan. Un di e mihor companianan na mundo den motivacion y trahadornan trahando den nan maximo ta e compania zappos y ora mi a studia e compania aki mi a ripara cu nan a crea un cultura di colegialidad entre e coleganan cu ta bai mucha mas lew cu simpel colega y empleado di e compania.

9: Sitio ta difisil pa jega.

Manera nos Mercado ta desaroyando tin hopi sitionan nobo cu ta bira “in” y e fluho di comercio tambe ta schuif bai na un otro sitio geografico. Nos ta jama esaki un market-shift, dus si e ubicacion ya no ta apto pa e negoshi mas, mester pensa pa cambia pa un otro sitio pa asina tin mas trafico y mas fasil pa clientenan jega na e negoshi. Blessings Steve   

(297) 7380777 stevefrancees@hotmail.com  

www.stevefrancees.blogspot.com

Si bo conoce un persona cu tambe lo beneficia di e post di awe, bo por forward e pe y sigur lo ta di beneficio pa tur cu ta den e barco di gerencia di un empresa. E idea ta pa mas persona por wordo beneficia y asina un juda otro cu nan conocementonan.  Pa cualkier pregunta of observacon por contact mi libremente. Slds Steve.

Tres abilidad cu un persona mester tin pa lanta un negoshi!

Tres abilidad cu un persona mester tin pa lanta un negoshi!

                                                                                               Scirbi pa: Steve Francees, Marketer

Hopi biaha bo ta puntra bo mes, cual ta e componentenan pa un empresa por sali padilanti y logra e meta di crece den un Mercado cu constantemente ta cambia! Pa un persona cuminsa un negoshi e mester tin tres abilidad basico pa asina e por sobresali como empresario.

Mayoria empresa ta cuminsa cu un persona cu ta bon den su area technico, despues di traha hopi aña kier lanta su propio negoshi, door cu e ta pensa cu e doño di negoshi ta gana hopi riba su cabes. E persona aki ta bon den su profecion, si e ta traha cu hero, e ta un bon welderdo, of un bon koki. E persona aki ta spaar su placa, fia serca famia of bai banco, y ta lanta su negoshi y ta cuminsa opera, y ta kere cu ser un technico den su profecion ta suficiente, y ta resulta cu mester di hopi mas pa maneha un negoshi cu djis sa bon kico bo ta hasi. Hopi empresa ta cay door cu for di principio e structura no tabata bon, si e koki ta pensa pa lanta su negoshi pa e bai traha como koki y traha tur e cumindanan exotico cu semper e kier a traha, esey lo manda e negoshi abou door cu awor e ta doño y awor e ta cay den un otro funcion, cu ta maneha e negoshi. Anyway, aki ta tres abilidad cu mester tin pa un negoshi por bira exitoso.

Technico: Tur persona cu cuminsa un negoshi mester sa di e negoshi, dus si e negoshi ta bende hero, bo mester sa tur cos cu ta ensera hero, si ta restaurant/snack, bo mester sa cushina, dus conose kico ta cushina, cu otro palabra bo mester sa kico bo ta hasiendo, esaki tambe ta bai ora bo ta duna un tipo di servicio.

Manager: E di dos abilidad cu bo mester tin ta e abilidad pa dirigi, ya bo no ta cushina mas pero mester por maneha e restaurant, dus maneha personal, cumpra y mantene stock, mester por pone y kita personal, traha cu banco, belasting, finansas, mercadeo, benta,  dus bo mester tin e abilidad di maneha. Hopi technico no ajega di traha den maneho y esaki ta un abilidad cu mester tin pa pusha e negoshi pa exito.

Comerciante: Hopi persona ta cuminsa un negoshi y ta lubida cu nan mester tin e abilidad di cumpra y bende y tambe por negocia cu ta comerciante, tambe e abilidad cu ora cosnan no ta bai dje bon ey pa toch tuma sierto decision cu no ta normal, asta diferente  cu pensamento  di otronan, pero cu na final e negoshi a keda cu cabes riba awa. Hopi persona vooral un technico no por wanta e precion ora tin menos benta y mester inverti den  propaganda y kere den dje pa asina por atrae mas clientenan. Bin cu strategianan nobo den temponan difisil. Esaki ta un abilidad cu bo no ta siña na scol pero trahando den e trabou den tempo difisil cu hopi precion y tumando conseho di personanan cu ya ajega di pasa door di mesun situacion.

E tres abilidadnan aki mester tin pa asina un persona por bira exitoso den un empresa y sigur negoshi no ta pa tur persona, e technico, ora e bende bon e aña ey ta bai y cumpra un auto nobo, pero e comerciante ta inverti e placa bek pa asina e por genera mas entrada den e aña siguiente. E manager ta administra loke e tin den su man y e comerciante ta mira futuro diferente cu tur otro persona den e negoshi y ta negocia tur loke e por pa asina e por saca un ganashi for di dje. Loke ta interesante ta cu tur e abilidadnan aki por wordo siña, si pone gana pa siñanan, tuma cursonan ta judabo sigur! Blessings Steve,

Pa consultancy: stevefrancees@hotmail.com y cu Dios bendiciona nos dushi Aruba! www.stevefrancees.blogspot.com (297) 7380777

Strategia di MARKETING VS “MENU di Restaurant”

Strategia di MARKETING  VS “MENU di Restaurant”

Scribi pa Steve Francees, online/offline Marketing Consultant

Ora bo sinta na un mesa den un restaurant e prome cos cu bo ta wordo ofreci ta e menu, a la cart, y akinan bo ta habri e Menu y aki e competencia ta cuminsa. Cada cuminda riba su mes kier bende mas y e persona cu ta mira e menu ta bezig ta scan prome, bira blachi y sigui scan te ora algo ta gana su atencion, eynan e ta bai mas diep den e contenido di e cuminda cu ta riba menu y ta hopi normal cu e persona ta puntra e waiter pa describi e cuminda, kico y con etc, dus detayes di e cuminda y un bon waiter lo guia tambe e persona pa hasi un bon escohencia. Bo ta haña tambe cu e waiter lo sugeri algun opcion y na final e persona lo tuma un decision basa riba tur e opcionan cu awordo presenta na dje. Ora un prospecto kier cumpra algo, esaki ta pasa cu ne!. E prospecto ta e persona sinta na mesa, e menu ta tur e empresanan cu ta bende practicamente mesun cos, e waiter ta personanan cu lo guia y influencia bo pa cumpra algo, por ta un amigo/mama/colega etc. Pero ban bek riba e menu, e cuminda cu ta mustra mas dushi, dus cu tin potret di dje cu ta echt juicy lo haña e prome atencion. Despues e persona cu ta e prospecto lo bai busca opinion di un “otro” prome cu e tuma un decision, tambe e prospecto ta check e contenido di e cuminda. Tur esakinan ta pasa prome cu un prospecto cumpra algo, decision no ta cay asina lihe mas, antes bo ta djis jega y bisa kico bo kier come y asta no ta mira menu mes, pero awor cosnan a cambia, prospectonan ta check calidad,contenido, ambiente, musica, nivel di servicio, rapides di servicio y tambe prijs, awor si tur extra surpasa e prijs, e prospecto lo cumpra loke abo ta bendiendo. Si pone tur e informacionan aki den accion lo mester mira bo empresa como un cuminda riba un menu y mester competi cu otro cumindanan pa asina por bende, si e waiter no recomenda bo, eynan lo bo sufri, si e imagen no ta juicy, tambe lo bo sufri, si bo posicion ta te patras ey riba e menu, tambe ta malo. Tin asina tanto factor importante cu bo mester tin prome cu un prospecto considera di cumpra loke bo tin y tur esaki tin di haber con inteligente bo ta handle bo marketing. Marketing mester crea atencion y den negoshi, di mas Marketing ta mihor cu di menos Marketing. Marketing inteligente ta sumamente importante pa posicion den e Mercado, e ta crea referrals pa bo empresa y productonan. Marketing no ta vet, dus no corte, pero mester wordo hasi inteligentemente. Ami ta voor pa test tur medianan y pa un temporada y check si tin resultado, den comienso ta mas difisil pa check door cu tur propaganda ta bezig ta crea bo nomber cu tambe ta e prome etapa di posicionamento den e Mercado. Dus e prome placa inverti den marketing ta djis pa bo nomber zona rond y despues ta sigui e fase cu mester tin un “call2action”, dus algo cu ta atrae e prospecto pa tuma e decision pa cumpra loke bo tin. Test tur marketing tactics, y saca afor cual a duna mihor resultado y ora un bai bon, no keda mucho tempo mas eynan, bolbe cuminsa di nobo bek, despues di tres rotacion bo ta cuminsa mira un “curve” den e impacto di bo marketing y eynan bo ta cuminsa conoce cual media lo por judabo promove bo productonan. 

Tur empresa kier pa nan ta e prome riba e Menu y esey ta un competencia diario cu bo mester bringa pa logra haña e posicion y mantene tambe. Loke mi ta mirando den e Mercado, ta cu empresanan ta inverti demasiado tiki den Marketing y tambe ta invert robes den marketing, cada empresa ta diferente y cada un mester wordo promociona diferente. Cada producto/servicio tin su target-market, y ta rekeri un media cu ta “fit” cu e target-market ey. Online bo mester ta fuerte y crece tur dia den online-marketshare, socialMedia y blogging ta e waiter cu bo mester pa recomendabo.  Imaginabo cu bo tin tur waiter na bo banda cu ta recomenda bo!, wel esey  ta excelente, pero esey ta e resultado di un Marketing masha inteligentemente hasi!. Studia bon e mercado y e tipo di prospecto cu bo kier atrae, check nan deseo y necesidad, e problema cu nan tin y djey bo ta traha bo strategia di marketing basa riba e necesidad y problemanan cu nan kier resolve den e bida y presenta cu abo tin e solucion cu bo product. Hasiendo esaki ya bo a gana 50% di atencion riba e Menu. Blessings Steve

Pa pregunta of conseho por jamami libremente: (297) 7380777 stevefrancees@hotmail.com www.stevefrancees.blogspot.com 

Masha danki pa e reaccion y preguntanan, y sigur mi tey pa duna conseho!

Mentalidad di Bai dilanti y no mira atras

Mentalidad di Bai dilanti y no mira atras

Scirbi pa Steve Francees, sales & marketing consultant 

 Bo sa kico ta strobabo den bida? Ta ora bo tuma un decision pa hasi algo y bo ta keda mira atras de bes en cuando!, cada bes cu bo bira mira atras, bo focus ta kita for di bo meta.  Tin hende tin masha problema cu esaki y ta strobando nan desaroyo. Un persona ta habri un negoshi pa ban mira con e lo bai!, ya e mindset ey no lo sirbibo pa nada, bo mester bai all-the-way, push abo mes te na final, no mira atras, inverti y bai dilanti, si mester pasa duro den e prome añanan, wel esey ta parti di e proceso y bo mester pasa door di dje y siña bo les con mester hasi’e mihor mañan!. Bai dilanti y no mira atras mester ta un decision cu abo mes ta tuma pa bo mes cumpli cu ne. Ami ta core mountainbiking y tambe ta core den competencia y ta gusta e adrenalina di competencia y tambe a gana varios competencia, no cu mi a train duro so, no, ta e mindset cu bo ta cuminsa e competencia, prome cu competencia mi ta train mi curpa pa obedece mi mente y ora rosea caba, y ya tur bo energia a baha y ainda falta tres sero pa subi, wel, amigonan, si ta pa bo curpa, lo bo lora bek y bai cas, pero ora bo mente bisabo cu bo mester termina e careda y termine den e prome 3nan of mi kier e recompensanan cu tin pa solamente e 3 promenan, eynan mente so por judabo. Otro cos cu mi tin tambe programa durante di careda ta e titel di mi blog-post di awe, nunca mira atras ken ta bini djis pusha y mira dilanti, hende tin neiging di mira atras, pero esaki lo no judabo pa nada. Lot su casa a bira un pilar di salo, djis pa mira atras, no laga bo curason keda pega den pasado, move-on, si bo tin un idea pa pone den accion, bai pe y no mira atras. Kisas bo tin un empresa cu benta no ta manera bo kier, wel no mira atras y keda pega y keda papia di temponan di gloria, traha duro y inverti awe pa mañan bo tin un tempo di gloria, si bo mester traha 2 ora mas tur dia, wel bo mester hasi’e, inverti den un plan strategico pa bo empresa, wel bo mester hasi’e. Un fout cu ta wordo hopi hasi den negoshi ta inverti den tur cos menos un plan strategico bon traha, con bo por bai guera sin un plan, tur pais cu ta bai guera mester di un plan strategico pa asina nan sa ken ta e enemigonan, cuanto nan ta, armanan cu nan tin, experencia cu nan tin, unda nan ta situa, cual ta nan fortalesanan y ora tin tur e informacionan ta bai traha un  plan con pa bataya segun e plan. Esaki ta hopi tristo, mira empresanan hasi asina fayo y perde placa door cu no a inverti den planning, menos hasi un research pa haña informacion pa planea riba dje. Bai dilanti y no mira atras!, esaki ta aplicabel den tur metanan di bida, no laga e miedo di faya paralisa e desaroyo, pensa cu prome cu gana un guera mester bringa den e guera, y bringa den guera no ta dushi ni ta fasil, pero ta sumamente importante pa bringa un bon guera cu lo jega na victoria. Bira amigo di personanan cu tin e fighting spirit ey, siña di nan, cana cu nan, studia con nan ajega na unda nan ta awor, y sigur lo bo mira cu nan a faya mas cu mayoria hende pero nan no a give-up. Benta ta abou, cos ta malo, y ta net  e momento ey nan kier corta den marketing, wel, ta net e ora ey bo mester hinca mas den marketing pa asina benta por bin bek positivo. Bo ta den e careda caba, no mira atras, pero bai padilanti, tur problema cu por presenta ta temporal, tene fe den Dios, traha duro y pone metanan halto y bai pe all-the-way. Network Marketing ta hopi in bek e ultimo aña aki y hopi ta drenta y ya despues di algun luna ta stop, wel, bo mester sigui pusha, bo ta traha den benta y cos no a bayendo bon e luna aki, wel, cambia strategia, bira mas creativo, educa bo mente, drecha bo manera di presenta bo producto, mehora bo fashi (fashion). Network marketing no ta malo, pero bo mester inverti tempo den dje y si bo no tin esey no drenta pa perde bo placa. Tur negoshi nobo mester inverti tempo den dje y esey ta un regla. Bai dilanti y no mira atras, esaki ta mi conseho pa bo awe. Blessings Steve 

Pa cualkier pregunta/conseho di benta of Marketing, por jamami na (297)7380777  Jama si bo kier pa benta subi!!!

stevefrancees@hotmail.com  www.stevefrancees.blogspot.com 

Usa loke bo tin!!!

Usa loke bo tin!!!

Scirbi pa Steve Francees, Business & Marketing Consultant

 Den bida tin hopi ta purba imita otro of ta anhela e bida di un otro y semper ta kere cu e otro tin mas abilidadnan cu e no tin!, esaki ta e fayo #1 pa no logra biba den bo potencial. Hende tin un miedo di ta nan mes y ta parse cu semper mester cana cu un mascara pa asina otronan no sa e realidad di bo y e pensamento aki ta bira un custumber, despues un cultura y na final bo realidad. No tene miedo di ta bo mes, e salesman mester bende segun su propio personalidad y papia di curason, esun cu ta atende cliente mester hasi’e lo mehor manera e ta sinti y cu profecionalismo  e cliente mester wordo trata, no mester “fake” nada, djis ta bo mes pero hasi tur cos cu excelencia, lo mehor cu bo por, usando tur bo abilidadnan, no worry si idioma ta e problema, hasi lo mehor den dje, e cliente lo aprecia ora e sinti cu bo ta bo mes. 

Saca e personalidad cariñoso cu bo tin den cashi warda, laga e sonrisa riba bo cara ta genuino,busca e interes di e cliente prome, busca pa sa ecxactamente su necesidad, no trata bo clientenan rapido, tuma tempo cu nan manera abo kier pa nan atende bo!. No laga problemanan stroba bo den bo trabou, keda enfoka den loke bo kier logra. Usa loke bo tin, tur loke mi a menciona, mi tin sigur cu bo tin tur y hopi mas ainda. Usa loke bo tin den bo man awe, no mira riba loke bo no tin, usa y actua riba loke bo tin. Pone metanan halto y lucha pa logranan, bo tin abilidad pa logra mas cu bo a logra te ainda, si otronan no kier, abo si mester bai door di usa loke bo tin.Djis pensa con e resultado lo ta ora abo logra e metanan!, sigur bo autoestima lo subi, famia lo ta mas contento, metanan logra ta crea mas felicidad, lo bo mira bida mas positivo y cu mas optimismo. Asta bo cara lo no haña plooi door cu hende felis cu ta hari contento, ta e ultimonan cu lo haña plooi, dus tin hopi beneficio. Inverti den bo propio desaroyo personal y profecional cu ta sumamente importante!. Usa loke bo tin, pone bo mes den accion cu locual bo tin y hasi’e den excelencia, hasi’e lo mehor cu bo por! Blessings Steve

(297) 7380777 stevefrancees@hotmail.com      www.stevefrancees.blogspot.com   

 Steve Francees, Business & Marketing Consultant

 **Diamars (11 di Maart) lo ta e ultimo dia pa inscribi pa “Mercadotecnia” (Marketing) en Español na Casa Del Mar Beach Resort! (5 Modules / 3 siman/Certificado) Fecha pa cuminsa: 13 di Maart, 7pm! 

E chines banda di cas!

E chines banda di cas!

Scirbi pa Steve Francees, Sales & Marketing Consultant

10 aña pasa mi a mira e sra di e chines banda di cas na estado, despues cu e sra ajega hopi jong di China, despues nan a haña dos yu mas. Tabata antajera ora mi a disidi di bai cumpra Vitamine water cu mi a drenta y mira e yu di 10 aña tras di e cahera y despues  di drenta e otro yu muher di 7 pa 8 aña ta saludami y puntra si e por judami cu algo!. Un rato mi a mira rond y a ripara cu berdad no tin ningun hende grandi ta manehando e mini-market, e mayornan chines no tabatey y e dos yunan aki tur dos bou di 10 aña ta atendiendo e negoshi. Den mi mes mi a pensa waw!, ta esaki e yunan a mira semper di nan mayornan y ya cu un edad asina hoben ta atendiendo un mini-market. E muchanan aki un par di dia tin tur loke mester pa maneha cualkier negoshi door cu ta esaki nan a mira e mayornan hasi.

Mi a keda impreciona di mira e scenario y a recorda un berdad masha importante, yunan ta mira loke mayornan ta hasi y nan lo hasi’e na final mihor cu e mayornan mes y esaki ta aplicabel den tur sentido di palabra. Si e mucha mira cosnan bon, e lo hasi cosnan bon, mesun cos ta conta pa cosnan malo tambe. Den tur cultura esaki ta pasa, mi tabata na Israel 4 luna pasa y tambe a mira e mesun efecto con e mayornan y e cultura ta stimula hobenan pa tuma iniciativanan empresarial y ya cu 21 aña un hoben Isreali ta cla pa maneha cualkier empresa y tuma risico den lanta empresa tambe. Tambe mi a bai Ramat-Gan cu ta e #2 na mundo despues di Silicon Valley(US) den business startups pa siña con nan ta maneha y crea startups, y ta e cultura mes ta urgi hobenan hopi jong pa tuma responsabilidad y no tin miedo pa faya pero tuma iniciativa pa bin cu algo nobo. E chines banda di cas tambe ta urgi su yunan pa tuma responsabilidad y kisas bo por pensa, ya, e mucha ta mucho jong etc, pero facto ta cu e mucha di 10 aña ta produciendo positivamente pa su desaroyo empresarial. Dus e pregunta awor cu nos por puntra nos mes, ki tipo di ehempel nos ta siñado nos yunan, of kico nan ta mira den nos, cu lo juda den nan bida mañan? Nos yunan ta produciendo of nan ta consumiendo tur cos? Un pregunta pa auto-evalua y ta hopi profundo pero necesario pa nos revisa kico lo bira di e generacion cu ta lantando y cu aki 10 aña lo tuma gran parti di e mundo empresarial over. Blessings Steve

Pa consultancy por jama/whatsapp (297)7380777  stevefrancees@hotmail.com

www.stevefrancees.blogspot.com

 

E mentalidad di liderazgo pa e luna di maart 2014 aki!

E mentalidad di liderazgo pa e luna di maart 2014 aki!

Scirbi pa Steve Francees.

Nos tur sa cu cos malo ta pega mas rapido cu cos bon, e corant cu lo caba mas lihe ta esun cu tin e potret mas cruel saca di e ultimo acidente riba frontpage. Masha straño pero hende gusta mira e malo prome cu e cos bon, un biaha bo a faya, ya a lubida tur e 100 bon cu bo a hasi, e computer a funciona perfecto pa 3 aña largo, djis paso awe e no kier sende, ya fuse-nan ta bula y ta cuminsa reclama cu e marca ey no ta sirbi. Hende ta birando tur dia menos tolerante y clientenan tur dia ta birando mas iritante y cu menos pasenshi. Nan kier drenta cumpra y sali, nada di perde tempo y asina nos por sigui menciona e cambionan den e actitud di e Mercado actual. Hende no ta kere mas tur loke bo bisanan, nan mes ta bai google e pa check si ta berdad, dus prome cu nan google e, abo mester google e prome. (esaki ta e reto cu empresanan tin, cu busca informacion nobo ta tuma hopi tempo). Nos mercado ta asina diversifica y empresanan mester diversifica den strategia di mercadeo pa alinea cu e prospecto y clientenan.  E unico manera cu por jega na un mehor rendimento empresarial ta cu si e empresa logra aglomera e fortalesanan di tur e trahadornan, trahando hunto den un causa y un direccion. Crea momentonan pa bira creativo y duna nan input den e situacion, trahadornan tin masha bon ideanan cu ta bai perdi door cu no ta logra saca nan, dus e funcion di director, manager ta birando tur dia mas complica, ta jega un momento cu nan mes no sa mas con por motiva e personal pa keda competitivo den e Mercado. Un problema hopi serio pero ta wordo alivia door di siña technicanan nobo y ta dispuesto pa modifica e mentalidad pa maneha y cuminsa crea espacio pa otronan tambe por duna nan opinion y mester tin respet tambe pa caba ken su opinion.

 

E empresa cu mester eherce poder pa maneha, ta na rand di peliger, dus e otro extremo cu semper awordo critica, dus menos regla y mas humano, den e ultimo añanan ta birando e structura nobo pa maneha(lo amplia despues riba esaki). Cosnan ta cambiando drastico den nos mundo moderno y liderazgo sigur. E mehor manera pa check un persona su performance ta mira si e ta trahando socialmente den su tempo liber y check si e ta guia un grupo di hendenan cu ta traha boluntariamente y cu toch e trabou ta cana bon!. Si e por hasi esey, casi sigur e lo por maneha un departamento cu hendenan cu ta wordo paga pa traha!. E era di liderazgo actual mester ta basa riba resultado, dus lagando cada ken traha na e forma cu e ta traha mehor y revisa si e resultado cu ta wordo logra. Dus no husga e proceso asina lihe, pero keda trankil pa mira si e resultado ta satisfactorio. (esaki ta contrario na liderazgo autocratico). Esaki nos por mira den e pais pa zuid di Aruba con ta usa tur manera pa mantene e control  y na final ta mustra toch un inseguridad formal den e structura di maneho aki. Bini hunto y dialoga ta reforsa comunicacion y desaroyo di tur empresa y e lider cu tin e abilidad aki lo genera mas entrada pa e empresa, lo crea un clima di colegialidad tambe. Trahadornan lo sinti mas pa e empresa y tuma nan trabou mas na pecho y sigur lo bini cu solucionan cu asta lo bo keda boca habri.  Awor cu ta den cuaresma tur hende ta mas manera “hende” y menos halsa!, esaki ta e mehor momento pa trece e gruponan hunto y motiva e personal, pone focus-group pa debati hunto pa e progreso di e empresa!. Unabes e temporada aki pasa lo ta mas difisil pero no imposibel. Dus usa e momento aki pa crea lasonan fuerte den e empresa entre e trahadornan y pone metanan mas cu alcansabel y nan lo traha pa jeganan sigur!.  Blessings Steve

Pa consultancy por jama/whatsapp (297)7380777  stevefrancees@hotmail.com

www.stevefrancees.blogspot.com