E parti
emocional di un "Bendedor Exitoso"
Hende tin tendencia di sinti mehor despues di risibi un bon
noticia of algo bon pasa, un bon noticia ta motiva bo spirito pa sigui lucha. E
parti emocional ta sumamente importante den e sentido cu hopi biaha como
persona bo mester por distingui kico ta emocional y kico ta realidad. Awe mi lo
comenta riba e carater di e bendedor con su estado mental mester ta pa asina
por logra kibra bareranan den e mercado di awe. Manera mi a bisa cu bon noticia
ta motivabo pa sigui padilanti, jammer cu normalmente un persona ta tende mas
mal noticia cu bon noticia. Tin un persona di edad cu ora e bel mi, ta over di
ken a muri so e ta papia, y esey ta loke e gusta pero ami no dje tanto ey, door
cu mi gusta mas loke ta duna bida, pero mi no por laga su manera di bida domina
mi estado mental, cu puro ken a muri. Tur dia mi ta ripara cu e hendenan den
nos comunidad ta bira mas negativo, nada no ta bon pa nan,corant mester saca
algo malo riba frontpage, si no, cos no ta bon. Nos ta wordo bombardia cu mal
noticia y na final esaki lo afecta bo estado mental cu sigur lo baha bo
desaroyo y bo performance den loke bo ta hasiendo y como bendedor, si bo bai
tras di tur loke bo ta tende,bo benta lo baha. Aki lo mi duna algun punto riba
e emocion cu mester ta bou di bo dominio.
1. Maneha bo emocion: Emocion ta mesun cos
cu un auto, ta abo tin e stuur pa maneha bo emocionan, si bo laga e parti
emocional dirigi bo bida, esaki lo tuma over y bo benta lo ta manera un “rollercoaster”
y no final no ta logra e meta. Bo por maneha bo emocion door di keda trankil y
puntra bo mes si loke bo ta “sintiendo” ta bale la pena sinti asina, bo tin
ganashi cu e sintimeno ey, e sintimento ta afectando bo progreso? Un persona
emocional, nunca lo logra di biba den su potencial door cu semper ta wordo
afecta pa “efectonan” cu ta bini den su
caminda.
2. Keda realistico: Tin hende gusta pinta
un musca pa un baca, noticia ta asina, y kisas bo mehor amiga tambe ta asina,
gusta exsagera, nos tur conoce hende asina, nan gusta “trigger” nan emocion cu “cosnan”
of noticianan straño etc. keda realistico, keda trankil, analisa bon kico bo ta
tendiendo y busca e “kern” di loke bo ta tendiendo, hopi biaha ta djis huma nan
ta purba describi y sin esencia fuerte. Keda realistico den tur cos, bo mester
logra bo meta diario, y si tur ta bisa cu e cliente ey no ta cumpra, abo si ta bisa
cu e persona ey tambe tin necesidad di loke mi ta bendiendo, dus ami si ta bai
serca dje.
3. Disidi pa logra loke abo kier: Ora un
persona tin un meta y ta bezig ta trahando pa logra e meta, e accion aki lo
minimalisa masha hopi mes cu efectonan secundario cu lo afecta su emocionan,
door cu su meta ta pa jega. E momento cu e persona aki, djis pa un rato pone
atencion riba loke ta “pasando” rond di dje y ta laga e informacionan aki toca
su emocionan, na e momento aki, e ta perde su concentracion. Tur bendedor
mester tin un meta pa traha pe, mester sa unda e kier jega y dicon e mester
traha duro awe pa logra bai tur su clientenan, meta pa logra ta judabo keda den
bo liña di trabou.
4. Si nan no kier, ami ta bai mi so:
Manera Joe Girard, e bendedor cu a gana Guiness record a bisa ora nan a puntre
ta con e la logra e record den benta aki. Simplemente, papia cu personanan cu
por judabo den bo benta, y conoce mas di bo producto, stop di sinta gasta tempo
ta papia di cosnan cu no tin sentido y ta papia cosnan cu lo afecta bo
emocionan. Hasi loke mester hasi pa logra bo metanan, si e otro bendedornan no
kier bai dilanti, abo si ta disidi di bai bo so y traha pa logra bo metanan.
5. Con por premia bo emocionan: Hende ta
gusta gana algo, tapesei bo ta mira asina tanto reina di beyesa y asta muhernan
ya hopi mayor, te ainda ta competi, door cu nan emocion kier sinti bon. Dus
hende gusta wordo premia despues di un
actividad cu a costa hopi energia, y ta sumamente importante pa bo mes
premia bo mes. Despues di un bon benta, ora e placa pasa riba bo salario na
banco, bo por premia bo mes cu algo, custumbra bo mes di premia bo mes cu
cosnan chikito. Si algo a bai bon e luna aki cumpra algo cu ta ekivalente di e
resultado di e luna. Pasobra e premionan chikito ta antesala pa e premio grandi
ora bo logra e meta di aña of meta di 5 aña of 10 aña. Premia bo mes y ta e
mihor remedi pa mantene bo emocionan riba un nivel cu lo judabo logra bo
metanan den benta. Blessings Steve
Preguntanan: Masha
danki pa e reaccionan cu mi ta risibi y door cu tambe tin varios preguntanan ta
wordo hasi, lo mi cuminsa contesta algun pregunta cu awordo hasi di e Mercado actual,
dus si bo tin un pregunta por mandami esaki y sigur lo mi elabora riba nan den
termino general, sin pone nomber etc. stevefrancees@hotmail.com
(297) 738-0777
