Scirbi pa Steve Francees : stevefrancees@hotmail.com: (297) 640-6403 (291B41BE)
1. Ta autentico: Tin un restaurant na Bonaire cu mi ta gusta bai ora mi bai Bonaire y ta Maiky Snack, sigur un dia boso ajega di tende di dje. Ta un restaurant cu nada di luho, dus si bo ta bai pa spera comodidad, airco, waiternan cu ta sirbi cu hopi protocol, wel si esey ta bo expectativa, mi kier bisabo cu lo bo hanja mas cu esey. E lugar ta djis un afdak traha den un cunuco, y echt un cucnuco, no tin airco y door cu ta un cunuco tin bestianan rond y bo ta sinti manera bo ta den un cunuco Boneriano. Dus no tin nada di luho pero e ambiente ta asina bon, e cuminda pa expectacular, e servicio ta personalisa door di e donjonan y henter e concepto aki ta unico, no tin otro y esey ta Maiky Snack. E cunuco ta hinca den Nikiboco patras aya, dus pa un persona jega bo mester puntra den Nikiboco unda pa drenta pa asina jega Maiky Snack. Nan ta autentico, nan no awori di imita ningun otro restaurant, y nan ta sirbibo manera nan ta, cu un curason habri y un servicio autentico. Nan ta ken nan ta, tapesey Maiky Snack a bira famoso y original/autentico.
2. Generosidad: Shon Ga a muri anja pasa y mi no ta corda un persona mas alegre cu Shon Ga, e tabata casa cu Oscar cu tambe a muri despues di Shon Ga a muri. Wel, nan tabata traha bolo pa hop anjanan y un biaha Shon Ga a contami cu no ta semper “cosnan” tabata asina bon pa nan pero mester a traha duro pa sali padilanti den bida lantando nan yunan. Ami ta corda cu semper Shon Ga tabata manda bolo di fruta y cualkier tipo di cos dushi cu e tabatin pami. Tur nos bolonan tabata di Shon Ga, y no tabata cumpra ningun bolo serca ningun otro hende sino ta Shon Ga. Awor Marlene su yu a keda y ta hasiendo mesun cos, nan ta hendenan generoso y esey ta laga nan jega caminda ningun otro por jega. Duna y lo bo hanja, esaki ta loke nan a hasi semper, y nunca nan a falta nada, si bo kier ta diferente, practica generosidad y Dios di shelo lo bendicionabo.
3. Conta storia: Mi ta corda Behos, un Arabir, nan tabata bende mas cara cu tur otro tienda, asta banda di nan tabatin un supermercado, pero ta serca Behos nos tabata bai, dicon?. Wel, e semper tabatin un cuenta, door cu e tabata conoce mi welonan, e semper tabata contami cuenta di mi welo Fanchi, door e la conoce nan den e tempo ey, e tabata mas hoben cu nan pero tabata hasi delivery pa nan e temponan ey. Ami tabata gusta esaki masha hopi mes y asta su sra tabata hopi carinjoso y tambe ta duna su comentarionan. Hende gusta tende cuenta y esaki no a sali di moda, alcontrario, segun estudionan hasi ta bisa cu conta cuenta ta e manera di mas fasil pa pasa un informacion door, door cu ta activa bo emocionan y creatividad, y ora logra esaki e persona cu ta tende e cuenta, door di a relacione cu su mes, nunca lo e lubida e cuenta y e mensahe su tras. Cu tempo bo ta kere cu bo a lubida pero lo bini bek ora algo bini bek den bo bida y ta bolbe lanta e storia aki. Marketing a cambia, bai den medianan masivo y grita mas duro cu competencianan ya no ta funciona den e boroto eyfor. Bo mester por jega cu un contenido relevante y capta atencion di esun cu bo kier pa tendebo. Pero prome bo mester gana e confiansa di e persona aki, door di usa e 3 puntonan ya menciona. Prome bo mester relaciona cu e persona, despues conecta cu e persona pa despues bende e persona e producto cu e mester.Ta importante pa negoshinan tende kico ta pasando cu nan clientenan, Pastornan tende kico e pueblo tin necesidad di dje, meneer di scol, cual ta e manera con e mucha sinja mas liher y cambia strategia pa e studiante compronde e vak mihor. No keda pega riba bo mesun manera pero pone empatia den funcion, busca pa sa,kico ta pasando rond di bo, y lo bo mira un cambio di e hendenan pa cu bo, clientenan mas satisfecho y un comunidad cu ta compronde otro.
No comments:
Post a Comment