E poder di Prospecting! Hopi ta faya den esaki! video ta menos cu 2 minuut!

Importancia di nos Actitud den e mercado actual!

Kico ta motiva un prospecto pa cumpra un producto of servicio!

Hopi biaha bo ta tende cu e mercado ta cambiando y no ta manera antes, wel, e mercado no ta cambiando pero ya a cambia caba. E mercado actual su manera di tuma decision a cambia y tapesey hopi empresanan ta perde cliente of bendedornan ya no ta bendiendo manera prome.Nos Mercado a diversifica den un Mercado multicultural, cu integracion di varios culturanan,pensamentonan, den personanan cu a bini pa establese nan mes den e comunidad durante di a ultimo añanan y ta bira parti den nos Mercado local. E Mercado tambe a desaroya y bira mas critic, cada persona tin un deseo y necesidad diferente. Esaki ta pone un precion fuerte riba empresanan pa tambe diversifica y cuminsa hasi negoshi diferente, tumando asina mas cambionan pa asina nan por sigui bende den e Mercado nobo aki! Hopi biaha si bo puntra un bendedor, kico bo ta bendiendo, y su contesta lo ta, sapato,tegels, cas etc, nan ta menciona loke segun nan ta loke nan ta bendiendo. Si analisa esaki por bisa cu nan ponencia no ta completamente corecto, pero tin tres producto cu e bendedor ta bendiendo.

E prome ta bo mes, e cliente ta mira abo como e prome producto, si bo ta representabel, bon actitud, exprecion di cara, e aparencia, motiva, si bo tin bon beis, sa con ta presenta e producto, e cliente ta sensitivo na esaki, y si e cliente no gustabo, e lo no cumpra, si tin esepcion pero e prome producto ta bo mes. Dus pa empresanan ta sumamente importante pa trata nan empleadonan bon y duna incentivo pa nan keda motiva. E cliente mester sinti aprecia cu bo tey pa jude y ta interesa den su beneficio.

E di dos producto, ta e “producto” mes, entre otro sapato, joyas, timesharing, seguro etc, e producto of servicio  mester ta uno bon y relevante, mester jena un necesidad cu tin den e cliente cu ta cumpre, y esaki ta mara na e calidad y prijs di e producto of servicio, e beneficionan semper mester supera e prijs, esaki ta e cliente ta disidi esaki den su parti cognitivo. Tambe e bendedor mester conose detayes di e producto/servicio pa asina por splica tambe tur detayes si ta necesario, un persona analitico ta gusta detayes. Esaki ta crea balornan adicional den mente di e prospecto cu na final ta tuma e decision pa cumpra e prodcuto. Tur producto mester tin garantia pa asina crea balornan agrega.

E di tres producto ta e compania, con e compania ta profila su mes, cu ta imagen, structura, seriedad, inovativo, interesa pa comunidad etc, e mercado mester por relaciona su mes directo y indirect cu e compania, si e compania ta activo den comunidad, e mercado prospecto por relaciona nan mes mas fasil cu e compania y ora di jega e momento pa tuma un decision, esaki lo pisa masha hopi mes.Dus prome cu un cliente tuma un desicion pa cumpra algo, den su mente e ta analisa tur e tres productonan aki, y tur tres mester ta bon pa asina e por tuma e decision final di cumpra e producto.  Dus mester tin e personal motiva, un bon producto y e compania mester ta bon pa asina keda “fit” den e mercado actual.nos Mercado ta multicultural y empresanan mester modifica sierto structuranan pa asina por bende lo mas posibel den e Mercado.

Tres abilidad cu un persona mester tin pa lanta un negoshi!

                                                                                                              Scirbi pa: Steve Francees, Marketer

Hopi biaha bo ta puntra bo mes, cual ta e componentenan pa un empresa por sali padilanti y logra e meta di crece den un Mercado cu constantemente ta cambia! Pa un persona cuminsa un negoshi e mester tin tres abilidad basico pa asina e por sobresali como empresario.

Mayoria empresa ta cuminsa cu un persona cu ta bon den su area technico, despues di traha hopi anja kier lanta su propio negoshi, door cu e ta pensa cu e doño di negoshi ta gana hopi riba su cabes. E persona aki ta bon den su profecion, si  e ta traha cu hero, e ta un bon welderdo, of un bon koki. E persona aki ta spaar su placa, fia serca famia of bai banco, y ta lanta su negoshi y ta cuminsa opera, y ta kere cu ser un technico den su profecion ta suficiente, y ta resulta cu mester di hopi mas pa maneha un negoshi cu djis sa bon kico bo ta hasi. Hopi empresa ta cay door cu for di principio e structura no tabata bon, si e koki ta pensa pa lanta su negoshi pa e bai traha como koki y traha tur e cumindanan exotico cu semper e kier a traha, esey lo manda e negoshi abou door cu awor e ta doño y awor e ta cay den un otro funcion, cu ta maneha e negoshi. Anyway, aki ta tres abilidad cu mester tin pa un negoshi por bira exitoso.

Technico: Tur persona cu cuminsa un negoshi mester sa di e negoshi, dus si e negoshi ta bende hero, bo mester sa tur cos cu ta ensera hero, si ta restaurant/snack, bo mester sa cushina, dus conose kico ta cushina, cu otro palabra bo mester sa kico bo ta hasiendo, esaki tambe ta bai ora bo ta duna un tipo di servicio.

Manager: E di dos abilidad cu bo mester tin ta e abilidad pa dirigi, ya bo no ta cushina mas pero mester por maneha e restaurant, dus maneha personal, cumpra y mantene stock, mester por pone y kita personal, traha cu banco, belasting, finansas, mercadeo, benta,  dus bo mester tin e abilidad di maneha. Hopi technico no ajega di traha den maneho y esaki ta un abilidad cu mester tin pa pusha e negoshi pa exito.

Comerciante: Hopi persona ta cuminsa un negoshi y ta lubida cu nan mester tin e abilidad di cumpra y bende y tambe por negocia cu ta comerciante, tambe e abilidad cu ora cosnan no ta bai dje bon ey pa tog tuma sierto decision cu no ta normal, asta diferente  cu pensamento  di otronan, pero cu na final e negoshi a keda cu cabes riba awa. Hopi persona vooral un technico no por wanta e precion ora tin menos benta y mester inverti den  propaganda y kere den dje pa asina por atrae mas clientenan. Bin cu strategianan nobo den temponan difisil. Esaki ta un abilidad cu bo no ta siña na scol pero trahando den e trabou den tempo difisil cu hopi precion y tumando conseho di personanan cu ya ajega di pasa door di mesun situacion.

E tres abilidadnan aki mester tin pa asina un persona por bira exitoso den un empresa y sigur negoshi no ta pa tur persona, e technico, ora e bende bon e anja ey ta bai y cumpra un auto nobo, pero e comerciante ta inverti e placa bek pa asina e por genera mas entrada den e aña siguiente. E manager ta administra loke e tin den su man y e comerciante ta mira futuro diferente cu tur otro persona den e negoshi y ta negocia tur loke e por pa asina e por saca un ganashi for di dje. Loke ta interesante ta cu tur e abilidadnan aki por wordo siña, si pone gana pa siñanan, tuma cursonan ta judabo sigur!

5 rolnan di marcadeo

Scirbi pa: Steve Francees

Tur strategia di mercadeo mester tin objetivonan cu mester wordo logra den un tempo previamente aproba. Mayoria biaha ora di papia di un strategia di mercadeo ta referi na e rol di mercadeo pa duna informacion di tal producto of servicio, dus publisidad y esey ta djis un parti di e rol di mercadeo. Awe lo mi amplia ariba e 5 rolnan di mercadeo.
Informa: E rol aki ta esun mas usa y e objetivo ta pa duna informacion di e producto of servicio. Mayoria biaha aki na Aruba ta traha un aviso of un commercial y ta publica den medionan masivo cu e objetivo cu prospectonan potencial por mira of lesa di e servicio/prodcuto cu na final lo cumpra e producto. E rol aki no ta nada mas cu duna informacion relevante di e producto of servicio.

Relaciona: E rol aki ta pa stablese un relacion directo entre e product of servicio cu e merdado meta, y por ta uno afectivo of racional di e necesidadnan di e consumidor y e cualidadnan di e producto/servicio. Cu otro palabra e consumidor mester por mira su necesidadnan wordo satisfase den e producto/servicio. Den e rol aki e diseño/text/imagen di e aviso of commercial ta dirigi specialmente ariba e necesidad di e consumidor,creando un relacion.

Recorda: Hopi biaha bo ta mira cu na un lansamento di un producto/servicio, hopi fanfara awordo hasi den publisidad pero despues di algun luna casi ni e nomber di e producto no ta wordo menciona mas den e Mercado. E rol aki ta pa e nomber di e producto/servicio keda fresco den memoria di e consumidor. E descuido di mas grandi ta wordo hasi den e rol aki door cu si bo no keda recorda e Mercado consumidor di bo producto/servicio tin hopi chance cu e ta bai pa un otro producto similar y abo a perde bo prome invercion den promocion. Keda semper mantene bo producto den e mente di e Mercado consumidor.

Modifica: Hopi biaha bo ta haña cu un producto of servicio pa cualkier motibo a haña un, no mal nomber pero a baha di nivel den e concepto di e consumidor, of algo no bon a pasa cu e producto, por ehempel un “re-call” y den e mente di e consumidor a crea un imprecion robes. Den caso asina bo mester trata na modifica e Mercado consumidor su percepcion pa e producto den bo aviso, comercialnan y tambe social. Hopi biaha un fabricante ta cumpra un otro fabrica di un producto similar y un tin cu bai pero mester pasa un e Mercado consumidor di uno pa e otro. Wel den un caso asina si e mercadeo faya bo ta perde e piscado cu su boto y pisca, ha ha djis un joke, cu otro palabra den casonan aki bo mester ta hopi sensetivo pa e reaccion di e Mercado consumidor.

Reforsa: Hopi biaha bo tin cu re-afirma di loke e Mercado consumidor ya sa caba di e producto, esaki ta pa ni duna ningun chance pa nan ni pensa di cumpra un otro producto cu ta similar cu esun di bo.

Mi ta spera cu loke mi a scibi awe por ta di beneficio pa tur cu ta sinta den e boto di mercadeo !

3 Tips Con pa Actua den Market Shift

Scirbi pa Steve Francees
Nos mundo actual ta cambionan rapido  y ta preciona nos mercado local tambe y nos por sinti esey den nos propio famia, empresa, comunidad, politica, financiero,comunicacion y asina nos por sigui menciona hopi mas cambio cu ta tumando lugar. Desaroyo no ta para y tur empresa mester desaroya prome cu e mercado, si no, bo ta “outdate” bo mes di e mercado. E mercado kier y lo mira dilanti y e empresa mester ta guiando e trend den e mercado.

E problema cardinal den empresanan cu ta cay atras den un market shifting ta empresanan cu nunca a desaroya hunto cu e Mercado, nan a kere cu semper nan lo sigui bende e mesun producto cu e mesun hendenan, y e problema ta cu nan no a realisa cu e “buying behavior” di e clientenan poco poco a bai ta cambiando y nan product/servicio ya no ta jena e nesesidad di e cliente mas, cu consequencia cu e empresa lo perde un cliente y su benta lo conose un caida. Yunan ya no ta cumpra na mesun lugarnan cu nan mayornan tabata cumpra, door cu nan manera di cumpra ta difirente cu nan mayornan, aki 3 punto con por actua.
1. Conose bo clientenan.
Hopi empresa no conose nan clientenan y no sa kico ta e desaroyonan cu ta tumando lugar den nan seno, manera familiar, trabou, frustacion,diberticion, interes, deseo,fracasonan, obesidad, fitness, behes, mudamento,educacion etc. Mi ta corda cu mi a lesa un relato di e comerciante cu tabata bisa cu su hobbi ta pa studia su clientenan, wel saca lo mas informacion posibel pa asina por conose nan mihor y e tabatin un relacion hopi personal,direct-indirect cu cada uno di su clientenan. Si bo conose bo clientenan y nan necesidadnan, lo bo sa cu un market shift ta biniendo y si bo sa e “wants & needs” di e cliente aki,y bo por desaroya un plan y pone den accion pa asina spera e shifting aki, y asta prome cu e tuma lugar abo tey pa jena e necesidad cu a wordo crea. Reseach, data,CBS,hasi pregunta(encuesta), relacion personal por judabo conose mas di bo clientenan.

2. Conose bo competencianan.
Den un Mercado manera nos isla nos mester conose nos competencianan, sa den cual direccion nan ta bayendo, cual strategia interno nan lo por a implementando, strategianan den mercadeo cu nan ta usando y purba midi nan resultado cu loke nan ta hasiendo. Siña for di nan, foutnan cu nan hasi, abo no mester hasi e esaki y ta spaar bo hopi tempo, energia y placa. Traha un swot analisis di nan, esaki ta un benchmarking riba nan, wel cu otro palabra sa kico nan ta hasiendo! *Tin un concepto cu ultimo añanan ta birando hopi popular y empresanan ta bai den e direccion aki ta cu “if you can’t beat them, join them” den comercio nos ta jama esaki merging y tin empresanan ta mihor nan opta pa merge cu otro pa sigui bringa cu otro y na final tur dos ta perde e guera, mundialmente esaki ta pasando tur dia.

3. Conose e trend internacional cu ta pasando cu empresanan cu ta den bo ramo.
Hopi cosnan cu ta pasando internacional lo jega tambe na bo porta, e por dura un tiki of lo jega mas rapido cu abo mes lo por pensa. Sigui di aserca loke ta pasando pafor di nos isla y keda atento pa tur cambio cu por tuma lugar pa asina abo tambe por hasi e ajustacionan necesario. Bai expo den exterior, check loke ta pasando na Europa, Merca, China etc y busca mas informacion di e cambionan cu ta tumando lugar, of bai seminarionan, lesa buki, papia cu otronan y check kico ta pasando cu nan y kico ta e cambionan cu nan ta hasiendo pa asina abo tambe por move hunto y mihor ta pa move prome cu e market shift.

15 Ideanan pa Mantene Clientenan Contento

Scirbi pa Steve Francees

1. Invita e clientenan pa bini bek.
Hopi biaha tin algun tipsnan cu ta asina fasil pa hasi cu ta duna hopi bon resultado pa asina mantene e clientanan contento, pero door cu no ta para keto na e datayesnan bo ta perde di gana. E ultimo palabra cu bo bisa e cliente lo por ta e ultimo imagen cu e ta hiba cas di bo empresa. Na final djis invita e cliente pa bini bek.

2. Regresa jamadanan di telefon lo mas rapido cu ta posibel.
Ora un cliente ta jama pa busca cualkier informacion lo mester busca e solucion pa su pregunta rapido y mester jama e cliente direct bek. No warda te mañan pa jama bek, mas liher bo reaciona, mihor e calidad di servicio lo ta pa e cliente. Regresa e jamada rapido, esaki ta laga e cliente sinti importante, y no tin nada mas bon ora un cliente sinti su mes satisfecho cu bo servicio. Tambe no laga e telefoon ring mas cu 2 biaha!

3. Traha un structura pa atende e-mail cu ta pa busca informacion.
Mescos cu jamadanan di telefoon, bo mester reaciona lo mas rapido riba email cu ta posibel.

Mester asigna un persona pa canalisa henter e procedura aki, revisa e-mail/fax etc mester bira parti di su trabou rutinario, mainta ta e mihor ora pa atende tur email y fax cu ta drenta. Y si ta un reclamo, esaki mester wordo atende lo mas rapido posibel, si tin telefoon por bel e cliente/prospecto personal pa atende e asunto aki.

4. Set-up un answering machine of voice mail system pa despues di oranan di trabou.
Tin hopi persona cu tin preguntanan y nan ta corda net despues di oranan di trabou, wel si tin un sistema di graba esaki ta bon door cu mainta depues un persona por atende esaki.  Mescos ta tambe si un persona dedica na sierto producto/servicio no ta den su ofisina, asina bo por laga un mensahe y e persona conserni por jama bek.

5. Puntra e clientenan kico mas por wordo hasi pa mantene un bon servicio.
Hopi cliente ta sintinan mes previligia ora bo inclui nan den bo strategia di trabou, e simpel accion cu bo ta tuma un feedback ta laga nan sinti cu nan ta parti di e famia di bo empresa. Ora nan duna cualkier contesta jamanan masha danki y laga semper e contacto habri pa asina si den futuro nan tin cualkier sugerencia nan lo wordo atendi direct.

6. Disculpa bo mes ora un di bo personal of compania faya.
Tur hende ta imperfecto y por faya y ora algo bai robes bo mester tambe tin e curashi di pidi sorry y si mester duna algo pornada lo mester hasi’e. Cu orguyo bo no ta gana nada, pero si bo por perde un cliente djis pa no disculpa bo mes. Esaki tambe ta ora pa motibonan di “forsa mayor” bo jega laat na un afspraak, disculpa bo mes tin mas balor cu bini cu henter un storia pakico bo a jega laat.

7. Organisa un seminario, retiro, fiesta,onder-onsje y invita bo clientenan.
Un cliente ta keda hopi contento ora bo invite pa bini pa un actividad cu bo empresa of persona ta organisa, e simpel echo cu bo ta tuma e iniciativa aki ta algo di hopi balor serca e cliente. E tipo di actividadnan aki ta trece hopi bon relacion entre abo y e clientenan. Por ta asta seminarionan cu ta di interes general, kisas cu no ta ni tin relacion cu bo producto/servicio, pero ta crea e relacion pa asina mantene e cliente contento.

8. Targeta di cumpleaños etc.
Tur persona ta sinti nan mes honra ora bo risibi un targeta riba un fecha hopi special pa bo, e por ta cumpleaños, matrimonio, yiu cu a slaag na scol, posicion nobo den compania, etc. E idea ta pa laga e cliente sinti bon door di bo gesto, semper mester firma e carchi cu pen nunca laga e carchi bai post cu solamente un stempel.

9. Ora bo haña un articulo cu ta fit bon pa bo cliente, djis forward e pa nan of tambe por fax-nan door.

Abo por sa kico ta di interes di bo clientenan, dus si bo lesa/mira algo cu ta relata na e cliente, djis mande pe, asina e ta sinti cu bo ta interesa den su propreso como persona.

10. Un sonrisa con contento y habri bo wowonan mas grandi

Un persona alegre semper ta atrae mas hendenan rond di dje, dus si tuma esaki, ta importante pa tur persona cu ta atende cliente mester smile cu e clientenan, si un salesperson no ta smile, esaki lo costa bo compania perdidanan grandi, door cu e cliente no ta sinti cu mes aprecia den bo negoshi y nan lo bai serca bo competencia cu si ta smile cu nan. Ora bo habri bo wowonan mas grandi esaki ta duna un sinjal cu bo ta aprecia e persona cu bo ta atendiendo, pero please no keda exagera si!

11. Newsletter.
Diseña un newsletter cu lo mester wordo reparti pa tur e clientenan, informacion di e inovacion den e compania y tambe ofertanan cu e cliente por beneficia di nan. Duna informacion relevante di e compania y tambe por trata temanan cu ta di interes di e cliente. No djis papia di bo logronan so, esaki ta cansa e clientenan! Pero informacion bon sigur lo capta atencion di bo clientenan y mantene nan informa.

12. Traha un file di adres, nomber y otro informacion importante di cada cliente.
Mas informacion bo tin di bo clientenan, mas chance bo tin pa satisfasenan cu bo producto of servicionan. Si un producto jega, por jama e clientenan pa bin mira locual ta nobo of bo por e-mail nan sierto informacion. Update e file aki tambe regularmente pa asina e informacion por kedo actual.

13. Corda nomber di bo clientenan.
No tur persona ta bon den recorda nomber di persona pero den negoshi nomber ta sumamente importante pa recorda y usa nan nomber durante di nan bishita na bo empresa. Esaki ta asina poderoso den benta y si train bo mes pa hasi esaki, lo bo mira cu e relacion cu e cliente lo bira tremendo y ta mas fasil pa abo bendenan.

14. Sorprende e cliente cu un descuento of un producto como regalo.
Tur persona gusta regalo y bo por duna un cliente frequente un regalo of un descuento riba sierto productonan. Tur persona ta gusta regalo of algo gratis.

Ami ta gusta cumpra perfume door cu semper mi ta hanja un sample gratis, y esaki ta un incentivo pa bo sigui cumpra.

15. Atende e yiunan di bo clientenan bon.
Tur mayor ta gusta pa personanan duna bon y bunita comentario di nan yiunan y bo por tin mangel of un persona cu por atende e yiunan ora nan bini pa cumpra(kids corner). Muchanan ta preti-wowo di nan mayornan, dus si trata nan bon lo bo tin hopi mas chance pa bende e mayornan.

Trahando for di cas por tin beneficio pa e empresa y trahador!

Scirbi pa Steve Francees

Hopi biaha nos ta djis sigui un cultura den trabou y ta kere cu esey ta e mihor con mester funciona. Nos ta bibando den un  Mercado hopi cambiante pero na final resultado ta conta, y ta resultado ta importante y na di dos lugar ta bini e sistema cu awordo usa pa jega na e resultado ey. E Mercado laboral actualmente ta mas global y no mester tey semper hunto hinca den un oficina pa asina e trabou por desaroya bon.

Technologia ta asina avansa cu por traha un otro caminda y tog tin aceso na comunicacion y asta por monitor un persona e cantidad di ora cu e ta trahando y tambe loke e ta hasiendo na e momento ey, dus si por monitor su trabou y check e resultado tambe direct online, dus e persona aki por traha cualkier parti di mundo y no ta afecta nada. Actualmente tin conference calls/skype/ cu por facilita tur e proceso di trabou.

Traha for di cas no ta dje conoci ey aki na Aruba pero ta pasando ya caba  bastante den e Mercado laboral, manera un muher cu a hanja complicacion durante di embaraso y mester keda cas mas tempo pero tog tin tempo pa sigui traha su trabou na cas, den su comodidad na cas y tin biaha asta cu mihor resultado door cu e persona aki tin menos stress door cu ta traha den su zona comodo na cas y dunando bon resultadonan.

 Tambe tin personanan cu sierto problemanan di salud cu ta hasi difisil pa bai trabou tur dia y nan ta hiba e trabou nan cas y ta traha na cas y ta bai trabou menos, solamente ora cu mester di ta den reunion of trata cliente etc. Un recepcionista por ta na un otro sitio y tog e comunicacion no ta wordo stroba, tin sierto aerolineanan cu ora bo jama nan, semper tin un otro pais cu ta coy e telefon y ta dunabo e mesun contesta cu esun aki na Aruba door di un structura bon den esaki.

Traha for di cas sigur lo mira un crecemento pa e anja aki y empresanan cu kier baha gastonan operacional lo por cuminsa pensa den e direccion aki y esaki lo por baha stress na trabou y tambe cu tanto persona ta keda cas malo. Si un persona ta sinti cu na cas e por traha mihor y tog duna un resultado bon y satisfactorio pa e empresa y tambe lo juda baha gastonan na oficina, esaki lo ta hopi bon. Si pone den practica pa un temporada y duna bon resultado, esaki lo por bira un opcion sigur door cu sigur gastonan na oficina lo baha, y si e persona ta duna mihor resultado den su trabou door di traha oranan flexible na cas, sigur e stress lo baha y e persona aki por ta asta mas creativo. Pa e manager-nan lo nan mester por maneha resultado mas y no mucho riba maneha e proceso den e trabou, y corda cu proceso por diferencia di cada persona, cada trahador ta hasi su mesun proceso den trabou diferente pero na final e resultado mester ta bon y satisfactorio.

Algo cu por stroba e proceso aki ta ora bo tin e cultura cu hefenan mester tin control absoluto den e proceso di trabou, nan ta wordo paga pa maneha proceso mas cu resultado. Na final di dia e empresa mester paga pa resultado di e  trabou y no presencia na trabou!Hopi biaha ta confundi esaki y ta pone mucho atencion na proceso y no resultado, un empresa ta factura resultado di e trabou cu awordo hasi. Trahando for di cas ta duna mas enfasis riba e resultado pa e empresa y na mes momento ta duna espacio pa mehora e proceso na banda di e trahador cu na final mester duna un bon resultado.

No ta tur persona por traha na cas door di e tipo di profecion,caracter y tambe e seguridad di informacionan confidencial tambe ta hunga un rol y esaki ta bai tambe riba e confiansa cu tin cu e trahador cu ta trahando na cas. Technologia ta na fabor di e proceso aki y ya tin tur structura cla caba pa asina por hasi trahamento for di cas posibel. Pa loke ta gastonan operacional esaki tambe lo ta na beneficio di e empresa door cu por usa e ofisina mas eficiente dus menos localidad y tambe utilidadnan sigur lo baha bastante.

Un trahador cu por traha na cas mester ta motiva pa logra metanan y mester ta disiplina pa tambe hasi e trabou, loke mester mantene ta un un linja entre trabou y e bida personal. Sigur ora un trahador ta trahando comodo lo duna un mihor resultado cu lo ta na beneficio di e empresa y tambe e trahador mes.

Eficiencia por crece of come bo cashflow

Scirbi pa Steve Francees
stevefrancees@hotmail.com

Nos ta den un aña cu lo bini cu hopi cambionan y ta pusha tur empresa pa traha mas eficiente den nan structura y cu hopi empresa ta perdiendo hopi mas entrada door cu no ta funciona eficiente den nan operacion. Hopi ta pensa cu eficiencia ta ora un trahador ta cumpli cu su oranan di trabou door di drenta 5 minuut prome y bai 5 minuut despues ora cumpli cu su oranan, y ta midi eficiencia riba e criteria aki, loke no ta completamente berdad. Na final di dia, un empresa ta midi su eficiencia cu oranan factura cu ta wordo paga door di e clientenan dus oranan di productividad cu ta juda pa factura e clientenan.

Ehempel di Servicio na cliente(customer service), e departamento aki no ta facura cliente pa atende nan pero ta duna un ayudo directo pa asina e cliente por cumpra e producto of servicio cu na final lo wordo factura. Empresanan cu no tin un structura di operacion ta stroba e fluho di eficiencia, door cu cada departamento y trahadornan ta traha nan mes structura y ta hasi loke ta mas aceptabel y loke ta mas combiniente pa nan na e momento ey.

Despues esaki ta bira un cultura y tur ta adapta na dje, y ora un trahador nobo bini, nan ta bisa cu ta semper nos a funciona asina y ta lucha pa cambia esaki, na final bo no por culpa e trahadornan pero e managernan cu no a hasi nan trabou eficientemente. Eficiencia mester ta presente for di benta y mercadeo, operacion y contabilidad y mester sincronisa hunto, y  nos ta depende di turismo, dus pa nos aki na Aruba, capital humano pa sumamente importante y e eficiencia den hende mester tin prioridad den cualkier empresa.

Un bon structura operacional y bon motivacion di personal ta central den cualkier empresa cu kier nan cashflow subi, pero tambe un structura operacional no eficiente y e personal no motiva, lo tin consequencia den e resultado di a calidad di servicio y esaki lo refleha bek den e cashflow. Si tuma un persona pa djis traha 8 ora y no entrene y motive pa asina e sa kico ecxactamente loke e mester hasi, ta bira cu e eficiencia di e persona aki lo ta abou y ni e persona, ni e empresa no tin beneficio pasobra ningun di dos ta bai dilanti y esaki ta crea hopi frustracion. Hopi ta tuma un trahador den servcio y ta”asumi” cu e persona sa e trabou y no ta tuma tempo pa entrene, y ta spera cu e persona aki hasi maravia den su posicion pero ainda e persona aki no sa suficiente di e operacion di e empresa y despues di 2 luna ta bisa cu e persona no a resulta door cu no sa su trabou.

Esaki ta pasa ora no tin un structura eficiente y esaki lo causa cu e operacion y servicio ta bai atras y no ta logra factura suficiente y di mes e cashflow ta bai atras. Aki 4 punto cu por juda pa drecha eficiencia, Prome: Purba di saca afor ecxactamente kico ta e problema y puntra mas personanan rond pa asina sa cu berdad esaki ta e problema. Di dos:Analisa  na unda e problema ta bira un problema y ta pega y ta stroba e eficiencia den e structura. Esaki por ta cu semper ta den sierto departamento “cosnan” ta pega. Mester analisa esaki bon. Di tres: Busca varios solucion pa e problema(kita hende di trabou no ta e prome solucion y kisas no mester kita hende mes), reuni y pone mas cabes hunto pa asina busca e solucion mihor.

Ora integra henter e personal pa busca solucion, esey ta laga e personal sinti cu nan tambe ta parti di e problema y solucion. Di cuatro: Pone un plan cu fecha den accion y mester cuminsa direct door cu no por hasi wega cu eficiencia door cu por costa e empresa hopi perdidanan y cu un mihor eficiencia, e personal tambe ta traha mas comodo. Un structura eficiente ta reduce friccion entre personal y tambe gerencia y mester mantene e canal di comunicacion habri pa posibel adaptacion pa semper mehora e eficiencia. stevefrancees.blogspot.com