Kima bo barco

Kima bo barco

Scribi pa Steve Francees

Cuanto biaha den nos bidanan, nos no a perde oportunidadnan door cu no a actua na e ora cu mester a actua! No tin un sentimento mas horibel cu ora bo haña sa cu bo mester a actua y bo no a actua, y pa colmo e oportunidad tambe a bai manera biento cu ta bai cu tur cos. Despues di algo asina bo ta sinti un perdedor y fracasa, pero warda!!Tin un diferencia masha grandi entre perde un bataya y bida den un fracaso!. E momento cu e perdedor logra bringa atrobe y ta drenta den un bataya di nobo, na e momento ey e estado di perdedor ta wordo aboli, kita, ya e estado di perdedor ta historia door cu bo ta drentando den un oportunidad bek di nobo pa cambia bo estado pa un victorioso. E estado di biba den fracaso, nunca lo kita y lo lagabo semper sinti y keda den e estado di fracaso. Peor ta cu e estado aki ta caba cu bo, ta mata bo futuro y bo creatividad lo logra. Please, amigo(a) busca pa ta den e prome grupo y lucha pa keda tambe den e prome grupo!

No warda pa temponan bon: Mi kier revelabo un secreto masha poderoso, tempo lo no drecha, y nunca tabatin bon tempo, tur ideanan exitoso awordo lansa den e peor temponan, den crisis financiero, falta di amor a inspira e mihor artistanan pa compone, dus usa e temponan malo, dus menos bon na bo probecho. Bijbel mes ta bisa, no sinta mira e tempo pa asina bo planta, djis tuma iniciativa y planta bo simia, no sinta warda mas! Awe ta e mihor dia pa bo planta bo simian!

Ningun hende lo kere den bo: Corda cu bo soño ta bo soño, no ta di bo mama,amigo, banco, scol,gobierno, no! ta bo soño, dus no busca aprobacion di hende pa logra bo soño. E unico cu mester y ta responsabel pa bo soño ta abo mes! Ningun hende mas!

Sigui E bos cu ta guiando bo: Den tur cos tin un bos cu ta papia cu bo, E bos cu abo ta tende bisabo loke bo mester hasi, ningun hende lo no compronde E bos ey, solamente abo y bo mester sigui’E. Hopi profundo den bo ser bo sa kico ta kima den bo curason, esey ta loke bo mester hasi. Ami ta jame Dios, pasobra nos a bini na mundo cu un proposito pa cumpli cu ne, y ta abo mester cumpli cu ne, laga E bos ey papia cu bo y dirigi bo.

Tuma tur e responsabilidad: Tur persona na mundo tin un doctorado den tira culpa riba otro, te ora cu bo compronde cu ta abo mester tuma tur e resposabilidad di bo actonan. Tur loke pasa cu bo ta bo responsabilidad y tambe tuma resposabilidad di bo sentimentonan tambe, 70% di tur bo decicionan ta basa riba sentimento of mihor bisa emocion y 30% ta realidad,hopi ta tuma decision riba con nan ta sinti na e momento ey y no riba realidad!. Den bida, tin por lo menos 250 persona cu kier bo bon y djis pa 1 persona cu a kibrabo, bo ta laga e unico persona aki tranca bo progreso? Esey no ta husto!bo ta bezig ta in-husto cu bo mes y esey no ta corecto.Tuma bo responsabilidad y no laga un minoria tranca bo progreso y esaki ta bo responsabilidad.

Disidi di traha duro: Nos ante-pasadonan tabata sinti bon despues di un dia duro di trabou, awor si esey pasa, nos ta pensa cu ya ta esclabo nos ta di nos hefe y di e structura actual. Tur hende ta hasi lo posibel pa no traha duro, no cumpli cu orario, busca e manera mas fasil pa keda cla mas lihe y gana mas tempo pa asina por disfruta mas di tempo liber. Bou di ningun ley ta posibel pa no traha duro y toch logra un bon resultado, esaki nunca a funciona y lo no funcioan tampoco. Trabou duro ta e secreto di tur exito y no laga ningun hende gaña bo, djis puntra un persona exitoso y sigur e lo splica esaki.

Kima bo barco: Den bida bo no por progresa cu un man teni na exito y fracaso di bo pasado. Asta exito di pasado lo no judabo den e era di awe. E disiplina cu a judabo logra na e exito sigur lo judabo pero keda pega riba e emocion di bo logronan di pasado lo strobabo pa logra exitonan nobo. Corta cu pasado, lubida di loke a keda atras, traha awe pa logra conkista teranan nobo. Tabatin un ehercito yen di soldatnan cu masha miedo den dje, pero nan mester a bai conkista teranan nobo, teranan cu mihor soldatnan, mihor armamento y cu mihor ekiponan di combate, bou di ningun sircunstancia lo tabatin un oportunidad pa e ehercito aki gana e teranan nobo aki. E general a subi henter e ehercito riba un barco y nabega te na costa di e teranan pa conkista, ora e ehercito a baha na e teranan nobo riba nan playa, e general a duna ordo pa kima tur e barconan. Ora e soldatnan a mira cu tur nan speransa pa bai bek awordo kima, a keda solamente un meta, derota e ehercito y conkista teranan nobo. Segun historia, nan a gana e guera. Bo mester kima e barco pa asina bo por pone bo ideanan den accion, mientrastanto bo no kimanan, lo bo no logra di conkista teranan nobo den bo bida, awe ta e dia pa kima bo barco.