Corta y laga bai! Pa
ciclo nobo habri!
Scirbi pa Steve Francees
Tur dia nos ta encontra cu hendenan cu kier rebiba morto,
nan kier sigui hasi tur loke a hasi antajera cu awe ya no ta sirbi mas. Hopi
duro pero berdad, pero nos mester acepta cu tur madures cu bida tin ciclonan cu
mester wordo respeta y ora un ciclo ta serando, esey ta nifica cu un otro
mester habri, mesun cos cu ora bo ta lesa un buki, pa bo habri un capitulo nobo
bo mester caba di lesa esun bieu y kita bo mirado di esun bieu y cuminsa figa
bo bista riba esun nobo. Esaki ta loke bo mester hasi, tin asina tanto cos cu
bo ta manteniendo ainda, cu ta practicamente cadaver cu no lo biba mas, door cu
e ciclo a pasa caba, mas bo tene na e ciclonan aki, mas bo ta stroba bo mes di
drenta den un ciclo nobo. Ciclonan ta den tur areanan di bida y cu madurez y
pensa cu nos mente, y menos cu nos emocionan. Emocion lo stroba e proceso di
sera ciclonan, cuanto biaha nos ta keda pega cu algo emocional demasiado tempo
y na final nos ta ripara cu tabata mihor pa djis a tuma e decision y sigui pa e
siguiente ciclo. Corta y laga bai!!!, Un di mi hobbienan ta pista na e baranca
entre Phoenix y La Cabana y cuanto biaha ora e haak pega y mal pega, ni maske
kico bo hasi, e no ta sali, wel a keda solamente un decision, corta y laga bai
y awe ta e dia pa tuma un decision. Tin cosnan nobo na caminda, oportunidadnan
nobo, areanan nobo, negoshinan nobo, mercado nobo, producto nobo, empleadonan
nobo, asta hefenan nobo, pero mester hasi cambionan pa asina e ciclo nobo por
habri. Un decision cognitivo y menos afectivo, djis corta y laga bai.
Den
empresanan tambe tin ciclonan, tempo pa inverti, tempo pa planta, tempo pa mira
e cosecha no bai dje bon ey, tempo pa mira un tremendo cosecha, tempo pa laga e
tera descansa, tempo pa bo mes tuma un descanso y tempo pa bolbe cuminsa di nobo.
Ta den e ciclonan aki cu empresanan ta perde vicion y ta sera, door cu no sa
den cual ciclo nan ta na e momento ey. E ciclonan aki semper tabatey y semper
lo existi. Un aña tin 12 luna y no tur ta lunanan pa cosecha y pa maneha un
empresa ta mesun cos cu e cunukero cu mester respeta e ciclonan natural cu Dios
mes a pone. Rey Salomon a bisa den Eclesiastes, cu tin un tempo pa tur cos bou
di shelo y bo mester diversifica den bo invercionan y planta den varios
cunuconan, door cu bo no sa cual lo produci mas, asta e ta bisa pa inverti den
7 of 8 cunuco diferente.
Tin ciclo den tur cos y awor nos ta drentando temponan
cu ciclonan lo habri y sera mas rapido cu nunca, ajera e clientenan tabata
“loco” cu e producto, ya awe nan no kier e mas door cu ta “outdated”,
increibel, pero esaki ta ciclonan. Ami ta gusta Rey Salomon su consehonan, y el
a bisa cu no perde tempo pa keda mira si awasero lo bini, djis planta y kere cu
e awesero lo bini, hopi empresa ta wardando e momento apropia jega y esaki lo
no sosode, ta abo mester crea bo propio tempo apropia. Tuma curashi y inverti
den loke bo ta kere den dje, hasi tur loke ta den bo alcanse pa hasi y confia
Dios cu E lo manda e awasero di clientenan pa bo. E unico cos cu lo por
strobabo ta bo mes, door di laga miedo strobabo di sera e ciclo bieu y tuma e
curashi pa drenta den e ciclo nobo, y duna bo 100% y lo mira e resultado!
Blessings Steve
(297) 7380777 (Whatsapp) stevefrancees@hotmail.com
No comments:
Post a Comment